23-Soorah-e-Al-Mominun-Aayat-118

Soorah-E-Al-Muminun

Aayaat-118

Shroo Allah Ke Naam Se Joh Bara Meherbaan Aur Nihayat Rehem Farmane Wala Hai.

1

Be Shak Eemaan Wale Raastgaar Ho Gaye.

2

Joh Namaaz Main Ijz-O-Niyaaz Karte Hain.

3

Aur Joh Behooda Baatoun Se Moonh More Rehte Hain.

4

Aur Joh Zakaat Ada Karte Hain.

5

Aur Joh Apni Sharamgaahoun Ki Hifazat Karte Hain.

6

Magar Apni Biwiyon Se Ya Kaneezoun Se, Joh In Ki Milkiyat Hoti Hain, Ke Un Se Mubbashrat Karne Se Inhain Malamat Nahi.

7

Aur Joh In Ke Siwa Auron Ke Taalib Houn Wo Khuda Ki Muqarrar Ki Hui Had Se Nikal Jaane Wale Hain.

8

Aur Joh Aamanatoun Aur Iqraaroun Ko Malhooz Rakhte Hain.

9

Aur Joh Namaazoun Ki Paabandi Karte Hain.

10

Ye Hi Loug Meeraas Hasil Karne Wale Hain.

11

Yaani Joh Behshat Ki Meeraas Hasil Karain Ge. Aur Us Main Hamehsha Rahain Ge.

12

Aur Ham Ne Insaan Ko Matti  Ke Khulase Se Paida Kia Hai.

13

Phir Us Ko Aik Mazboot Aur Mehfooz Jaga Main Nutfa Bana Kar Rakha.

14

Phir Nutfe Ka Lothra Banaya. Phir Lothre Ki Boti Banai Phir Boti Ki Haddiyan Banayee,  Phir Haddiyoun Par Gosht Post Charhaya. Phir Us Ko Nai Soorat Main Bana Dia. Toh Khuda Joh Sab Se Behtar Banane Wala Bara Ba Barkat Hai.

15

Phir Us Ke Baad Tum Mar Jate Ho.

16

Phir Qiamat Ke Din Utha Khare Kiye Jao Ge.

17

Aur Ham Ne Tumhare Oopar Ki Jaanib Saat(7) Aasmaan Paida Kiye. Aur Ham Khalqat(Makhlooq) Se Gaafil Nahi Hain.

18

Aur Ham Hi Ne Aasmaan Se Aik Andaaze Ke Sath Paani Nazil Kia. Phir Us Ko Zameen Main Thehra Dia Aur Ham Us Ke Nabood Kar Dene Par Bhi Qaadir Hain.

19

Phir Ham Ne Us Se Tumhare Liye Khajooroun Aur Angooroun Ke Bagh(Garden) Banaye, Un Main Tumhare Liye Bohot Se Maiwe Paida Hote Hain. Aur Un Main Se Tum Khaate Ho.

20

Aur Wo Darakht (Tree) Bhi Ham Hi Ne Paida Kia Joh Toor-E-Seena Main Paida Hota Hai, Yaani Ziatoon Ka Darakhat Ke Khaane  Ke Liye Roghan Aur Saalan Liye Hue Ugta Hai.

21

Aur Tumhare Liye Chaar Paaiyoun Main Bhi Ibrat Aur Nishani Hai Ke,  Joh Un Ke Paitoun Main Hai, Us Se Ham Tumhain Doodh Pilaate Hain Aur Tumhare Liye Un Main Aur Bhi Bohot Se Faaide(Benefits) Hain Aur Baaz Ko Tum Khaate Bhi Ho.

22

Aur Un Par Aur Kashtiyoun Par Tum Sawaar Hote Ho.

23

Aur Ham Ne Nooh Ko Un Ki Qoum Ki Taraf Bhaija Toh Unhoun Ne Un Se Kaha Ke Ae Qoum! Khuda Hi Ki Ibadat Karo, Us Ke Siwa Tumhara Koi Maabood Nahi, Kia Tum Darte Nahi.

24

Toh Un Ki Qoum Ke Sardaar Joh Kaafir The Kehne Lage Ke Ye Toh Tum Hi Jaisa Aadmi Hai. Tum Par Barai Hasil Karna Chahta Hai. Aur Agar Khuda Chahta Toh Farishte Utaar Deta. Ham Ne Apne Agle Baap Dada Main Toh Ye Baat Kabhi Suni Nahi.

25

Is Aadmi Ko Toh Deewangi Ka Aarza(Bimari) Hai Toh Is Ke Bare Main Kuch Muddat Intizar Karo.

26

Nooh Ne Kaha Ke Parwardigar Unhoun Ne Mujhe Jhutlaya Hai Tu Meri Madad Kar.

27

Pas Ham Ne Un Ki Taraf Wahi Bhaiji Ke Hamare Saamne Aur Hamare Hukum Se Kashti Banao. Phir Jab Hamaara Hukum Aa Pohonche Aur Tanoor Paani Se Bhar Kar Josh Maarne Lage, Toh Sab Qisam Ke Haiwaanat Main Se Jora Jora Yaani Nar Aur Maada Do Do Kashti Main Bitha Lo, Aur Apne Ghar Waloun Ko Bhi, Siwa Un Ke Jin Ki Nisbat In Main Se Halaak Hone Ka Hukum Pehle Sadir Ho Chukka Hai. Aur Zalimoun Ke Bare Main Ham Se Kuch Na Kehna, Wo Zaroor Dibo Diye Jaaye Ge.

28

Aur Jab Tum Aur Tumhare Saathi Kashti Main Baith Jaao Toh Khuda Ka Shukar Karna Aur Kehna Ke Sab Taareef Khuda Hi Ki Sawazwaar Hai. Jis Ne Ham Ko Zaalim Logon Se Nijaat Bakhshi.

29

Aur Ye Bhi Dua Karna Ke Ae Parwardigar,  Ham Ko Mubarak Jaga Utaariyo Aur Tu Sab Se Behtar Utaarne Wala Hai.

30

Be Shak Is Qisse Main Nishaaniyan Hain Aur Hamain Toh Aazmaaish Karni Thi.

31

Phir Un Ke Baad Ham Ne Aik Aur Jamaat Paida Ki.

32

Aur Un Hi Main Se Un Main Aik Paigambar Bhaija Jis Ne In Se Kaha Ke Khuda Hi Ki Ibadat Karo Ke Us Ke Siwa Tumara Koi Maabood Nahi,Toh Kia Tum Darte Nahi.

33

Toh Un Ki Qoum Ke Sardar Joh Kaafir The Aur Aakhrat Ke Aane Ko Jhoot Samajhte The Aur Dunia Ki Zindagi Main Ham Ne Un Ko Aasoodgi De Rakhi Thi. Kehne Lage. Ke Ye Toh Tumhi Jaisa Aadmi Hai, Jis Qisam Ka Khana Tum Khate Ho, Ussi Tarha Ka Ye Bhi Khata Hai Aur Joh Paani Tum Peete Ho Ussi Qisam Ka Ye Bhi Peeta Hai.

34

Aur Agar Tum Ne Apne Hi Jaise Aadmi Ka Kaha Maan Liya Toh Ghaate Main Par Gaye.

35

Kia Ye Tum Se, Ye Kehta Hai Ke Tum Jab Mar Jaao Ge Aur Matti Ho Jao Ge Aur Istakhwaan Ke Siwa Kuch Na Rahe Ga Toh Tum Zameen Se Nikaale Jao Ge.

36

Jis Bat Ka Tum Se Wada Kia Jata Hai Bohot Baeed Aur Bohto Baeed(Yaqeeni) Hai.

37

Zindagi Toh Ye Hi Hamri Dunia Ki Zindagi Hai, Ke Issi Main Ham Marte Aur Jeete Hain, Aur Ham Phir Nahi Uthaye Jaayege.

38

Ye Toh Aik Aisa Aadmi Hai Jis Ne Khuda Par Jhoot Iftiraa Kia Hai Aur Ham Is Ko Maan-Ne Wale Nahi.

39

Paigambar Ne Kaha Ke Ae Parwardigar Inhoun Ne Mujhe Jhoota Samahja Hai, Tu Meri Madad Kar.

40

Farmaya Ke Ye Thore Hi Arse Main Pashaimaan Ho Kar Reh Jaye Ge.

41

Toh Un Ko Waada-E-Barhaq Ke Mutabiq Zor Ki Awaz Ne Aa Pakra, Toh Ham Ne In Ko Koora Kar Daala. Pas Zaalim Lougon Par Laanat Hai.

42

Phir Un Ke Baad Ham Ne Aur Jamaatian Paida Keen.

43

Koi Jamat Apne Waqt Se Na Aage Ja Sakti Hai Na Peeche Reh Sakti Hai.

44

Phir Ham Pae Dar Pae, Apne Paigambar Bhaijte Rahe. Jab Kisi Ummat Ke Pas Us Ka Paigambar Aata Tha Toh Wo Usse Jhutla Dete The, Toh Ham Bhi Baaz Ko Baaz Ke Peeche Halak Karte Aur Un Par Azaab Laate Rahe Aur Un Ke Afsaane Banate Rahe. Pas Joh Loug Eemaan Nahi  Late Un Par Laanat.

45

Phir Ham Ne Moosa A.S. Aur Un Ke Bhai Haroon A.S. Ko Apni Nishanaiyan Aur Daleel-E-Zahir De Kar Bhaija.

46

Yaani Firown Aur Us Ki Jamaat Ki Taraf,Toh Unhoun Ne Takkabur Kia Aur Wo Sarkash Loug The.

47

Kehne Lage Ke Kia Ham Un Apne Jaise Do Aadmiyoun Par Eemaan Le Aaye, Aur Un Ki Qoum Ke Loug Hamare Khidmat Gaar Hain.

48

Toh Un Lougon Ne Un Ki Takzeeb Ki So Aakhir Halak Kar Diye Gaye.

49

Aur Ham Ne Moosa A.S. Ko Kitab Di Thi Taa-Ake Wo Loug Hidayat Paayen.

50

Aur Ham Ne Maryam Ke Bete Eesa. Aur Un Ki Maan(Mother) Ko Apni Nishani Banaya Tha Aur Un Ko Aik Oonchi Jaga Par Joh Rehne Ke Laaiq Thi Aur Jahan Nithra Hua Pani Jaari Tha, Panaah Di Thi.

51

Ae Paigambaro!  Paakeeza Cheezain Khao Aur Amal-E-Naik Karo. Joh Amal Tum Karte Ho Main Un Se Waaqif Hoon.

52

Aur Ye Tumhari Jamaat, Haqeeqat Main Aik Hi Jamaat Hai Aur Main Tumahra Parwardigar Hoon Toh Mujh Se Daro.

53

Phir Unhoun Ne Apas Main Apne Kaam Ko Muttafarriq Kar Ke Juda Juda  Kar Dia. Joh Chez Jis Firqe Ke Paas Hai Wo Uss Se Khush Ho Raha Hai.

54

Toh Un Ko Aik Muddat Tak Un Ki Gaflat Hi Main Rehne Do.

55

Kia Ye Loug , Ye Khayal Karte Hain Ke Ham Joh Dunia Main In Ko Maal Aur Baitoun Se Madad Dete Hain.

56

Toh Us Se Un Ki Bhalaye Main Jaldi Kar Rahe Hain, Nahin Balke Ye Samajhte Hi Nahi.

57

Joh Loug Apne Parwardigar Ke Khof Se Darte Hain.

58

Aur Joh Loug Apne Parwardigar Ki Aayatoun Par Eemaan Rakhte Hain.

59

Aur Joh Apne Parwardigar Ke Sath Shareek Nahi Karte.

60

Aur Joh De Sakte Hain Dete Hain Aur Un Ke Dil Is Bat Se Darte Rehte Hain Ke Un Ko Apne Parwardigar Ki Taraf Lout Kar Jana Hai.

61

Ye Hi Loug Naikiyoun Main Jaldi Karte Aur Ye Hi Un Ke Liye Aage Nikal Jate Hain.

62

Aur Ham Kisi Shakhs Ko Us Ki Taaqat Se Ziada Takleef Nahi Dete Aur Hamare Paas Kitaab Hai, Joh Sach Sach Keh Deti Hai Aur Un Lougon Par Zulm Nahi Kia Jaye Ga.

63

Magar Un Ke Dil In Baatoun Ki Taraf Se Gaflat Main Pare Hue Hain, Aur In Ke Siwa Aur Aamaal Bhi Hain Joh Ye Karte Rehte Hain.

64

Yahan Tak Ke Jab Ham Ne Un Main Se Aasooda Haal Lougon Ko Pakar Lia, Toh Wo Us Waqt Tilmila Uthain Ge.

65

Aaj Mat Tilmilaao! Tumko Ham Se Kuch Madad Nahi Mile Gi.

66

Meri Aaytain Tum Ko Parh Parh Kar Sunai Jati Theen Aur Tum Ulte Paaon Phir Phir Jate The.

67

Un Se Sarkashi Karte, Kahaaniyoun Main Mashgool Hote Aur Behooda Bakwas Karte The.

68

Kia Inhoun Ne Is Kalam Par Ghour Nahi Kia, Ya In Ke Pas Koi Aisi Cheez Aaye Hai Joh In Ke Agle Baap Dada Ke Paas Nahi Aye Thi.

69

Ya Ye Apne Paigambar Ko Jaante Pehchaante Nahi, Is Waja Se Un Ko Nahi Maante.

70

Kia Ye Kehte Hain Ke Isse Souda Hai, Nahi Balke Wo Un Ke Paas Haq Ko Le Kar Aye Hain Aur Un Main Se Aksar Haq Ko Na Pasand Karte Hain.

71

Aur Agar Khuda-E-Barhaq In Ki Khuahishoun Par Chale, Toh Aasmaan Aur Zameen Aur Joh In Main Hain Sab Darham Barham Ho Jaaye. Balke Ham Ne Un Ke Pas Un Ki Naseehat Ki Kitaab Pohoncha Di Hai Aur Wo Aisi Kitaab-E-Naseehat Se Moonh Phair Rahe Hain.

72

Kia Tum Un Se Tableeg Ke Sile Main Kuch Maal Maangte Ho, Toh Tumhara Parwardigaar Ka Maal Bohot Acha Hai Aur Wo Sab Se Behtar Rizq Dene Wala Hai.

73

Aur Tum Toh Un Ko Seedhe Raaste Ki Taraf Bulate Ho.

74

Aur Joh Loug Aakhrat Par Eemaan Nahi Laate Wo Raste Se Alag Ho Rahe Hain.

75

Aur Agar Ham Un Par Rehem Karain Aur Joh Takleefain Un Ko Pohonch Rahi Hain,Wo Door Kar Dain Toh Apni Sarkashi Par Arrde(zidd) Rahain Aur Bhatakte Phirain.

76

Aur Ham Ne Un Ko Azab Main Bhi Pakra Toh Bhi Unhoun Ne Khuda Ke Aage Aazji Na Ki Aur Wo Aajzi Karte Hi Nahi.

77

Yahan Tak Ke Jab Ham Ne Un Par Azaab-E-Shadeed Ka Darwaza Khol Dia, Toh Us Waqt Wahan Na Umeed Ho Gaye.

78

Aur Wo Hi Toh Hai Jis Ne Tumhare Kaan Aur Aankahin Aur Dil Banaye. Lekin Tum Kam Shukar Guzaari Karte Ho.

79

Aur Wo Hi Toh Hai Jis Ne Tumko Zameen Main Paida Kia Aur Ussi Ki Taraf Tum Jama Ho Kar Jaao Ge.

80

Aur Wo Hi Hai Joh Zindagi Bakhashta Aur Mout Deta Hai Aur Raat Aur Din Ka Badalte Rehna Ussi Ka Tassarruf Hai, Kia Tum Samajhte Nahi.

81

Baat Ye Hai Ke Joh Baat Agle Kaafir Kehte The Ussi Tarha Ki Baat Ye Kehte Hain.

82

Kehte Hain Ke Jab Ham Mar Jaayen Ge Aur Matti Ho Jaaye Ge Aur Istikhwaan-e-Boseeda Ke Siwa Kuch Na Rahe Ga Toh Kia Ham Phir Uthaaye Jaaye Ge?

83

Ye Waada Aur Ham Se Pehle Hamare Baap Dada Se Bhi Hota Chala Aya Hai,  Ye Toh Sirf Agle Lougon Ki Kahaaniyan Hain.

84

Kaho Ke Agar Tum Jaante Ho, Toh Baataao Ke Zameen Aur Joh Kuch Zameen Main Se Hai Sab Kis Ka Maal Hai?

85

Jhat Bol Uthain Ge Ke Khuda Ka Kaho Ke Phir Tum Sochte Kion Nahi?

86

In Se Poocho Ke Saat(7) Aasmaanoun Ka Koun Malik Hai Aur Arsh-E-Azeem Ka Koun Malik Hai?

87

Be Saakhta Keh Dain Ge Ke Ye Cheezain Khuda Hi Ki Hain, Kaho Ke Phir Tum Darte Kion Nahi?

88

Kaho Ke Agar Tum Jaante Ho Toh Bataow Ke Wo Koun Hai Jis Ke Hath Main Har Cheez Ki Baadshahi Hai, Aur Wo Panaah Deta Hai Aur Us Ke Muqabil Koi Kisii Ko Panaah Nahi De Sakta.

89

Foran Keh Dainge Ke Aisi Baadshahi Toh Khuda Hi Ki Hai, Kaho Phir Tum Par Jaadu Kahan Se Par Jaata Hai?

90

Baat Ye Hai Keh Ham Ne Un Ke Paas Haq Pohoncha Dia Hai Aur Ye Joh Butt Parasti Kiye Jate Hain Be Shak Jhoote Hain.

91

Khuda Ne Na Toh Kisi Ko Apna Baita Banaya Hai Aur Na Us Ke Sath Koi Aur Maabood Hai, Aisa Hota Toh Har Maabood Apni Apni Makhlooqaat Ko Le Kar Chal Deta Aur Aik Doosre Par Gaalib Aa Jata. Ye Loug Joh Kuch Khuda Ke Bare Main Bayan Karte Hain Khuda Us Se Paak Hai.

92

Wo Posheeda Aur Zahir Ko Janta Hai Aur Mushrik Joh Us Ke Sath Shareek Karte Hain, Us Ki Shan Us Se Buland Hai.

93

Ae Muhammad S.A.W. Kaho Ke Ae Parwardigaar Jis Azaab Ka In Kuffar Se Waada Hua Hai, Agar Tu Meri Zindagi Main Un Par Naazil Kar Ke Mujhe Bhi Dikhaye.

94

Toh Ae Parwardigar! Mujhe Is Se Mehfooz Rakhiyo Aur Un Zaalimoun Main Shamil Na Kijiyo.

95

Aur Jo Waada Ham Un Se Kar Rahe Hain Ham Tum Ko Dikha Kar Un Par Naazil Karne Par Qaadir Hain.

96

Aur Buri Baat Ke Jawab Main Aisi Baat Kaho, Joh Nihayat Achi Ho. Aur Ye Joh Kuch Bayan Karte Hain Hamain Khoob Maloom Hai.

97

Aur Kaho Keh Ae Parwardigar ! Main Shaitaanon Ke Waswasoun Se Teri Panah Maangta Hoon.

98

Aur Ae Parwardigar! Is Se Bhi Teri Panaah Maangta Hoon Ke Wo Mere Paas Aa Mojood Houn.

99

Ye Loug Issi Tarha Gaflat Main Rahian Ge Yahan Tak Ke Jab In Main Se Kisi Ke Paas Mout Aa Jaye Gi Toh Kahe Ga Ke Ae Parwaridigaar!  Mujhe Phir  Dunia Main Wapas Bhaij De.

100

Taa-Ake Main Us Main Jisse Chor Aaya Hoon Naik Kaam Kia Karoon. Har Gizz Nahi .Ye Aik Aisi Baat Hai Ke Wo Usse Zabaan Se Keh Raha Hoga Aur Is Ke Sath Amal Nahi Hoga Aur Un Ke Peeche Barzakh Hai Jahan Wo Is Din Tak Ke Dobara Uthaye Jaaayen Ge, Rahian Ge.

101

Phir Jab Soor Phooonka Jaye Ga, Toh Na Toh In Main Qaraabatain Rahain Gi Aur Na Aik Doosre Ko Poochain Ge.

102

Toh,  Jin Ke Amaloun Ke Bojh Bhaari Hounge. Wo Falah Pane Wale Hain.

103

Aur Jin Ke Bojh Halke Hounge Wo Woh Loug Hain Jinhoun Ne Apne Taiee Khasaare Main Daala. Hamesha Dozakh Main Rahain Ge.

104

Aag In Ke Moohoun Ko Jhulsa De Gi Aur Wo Is Main Taiwri Charhaaye Hounge.

105

Kia Tum Ko Meri Aayatain Parh Kar Sunai Jatee Thee, Nahi Tum Un Ko Sunte The Aur Jhutlaate The.

106

Ae Hamare Parwardigaar!  Ham Par Hamari Kam Bakhti Gaalib Ho Gai Aur Ham Raste Se Bhatak Gaye.

107

Ae Parwardigar! Ham Ko Is Main Se Nikaal De,Agar Ham Phir Aise Kaam Karain Toh Zalim Hounge.

108

Khuda Farmaaye Ga, Ke Issi Main Zillat Ke Sath Pare Raho Aur Mujh Se Baat Na Karo.

109

Mere Bandoun Main Aik Gurroh Tha Joh Dua Kia Karta Tha Ke Ae Hamare Parwardigar Ham Eemaan Laye Toh Tu Ham Ko Bakhsh De Aur Ham Par Rehem Kar Aur Tu Sab Se Behtar Rehem Karne Wala Hai.

110

Toh Tum Un Se Tammaskhur Karte Rahe,  Yahan Tak Ke Un Ke Peeche Meri Yaad Bhi Bhool Gaye Aur Tum Hamesha Un Se Hansi Kia Karte The.

111

Aaj Mai Ne Unko Un Ke Sabar Ka Badla Dia Ke Wo Kaamyaab Ho Gaye.

112

Khuda Pooche Ga, Ke Tum Zameen Main Kitne Baras Rahe?

113

Wo Kahain Ge Ke Ham Aik Roz Ya Aik Roz Se Bhi Kam Rahe The, Shumaar Karne Waloun Se Pooch Lijiye.

114

Khuda Farmaye Ga, Ke Wahan Tum Bohot Hi Kam Rahe. Kaash Tum Jaante Hote.

115

Kia Tum Ye Khayal Karte Ho Ke Ham Ne Tum Ko Be Faaida Paida Kia Hai Aur Ye Ke Tum Hamari Taraf Lout Kar Nahi Aao Ge?

116

Toh Khuda Joh Sachha Baadsha Hai Us Ki Shan Is Se Oonchi Hai, Us Ke Siwa Koi Maabood Nahi, Wo Hi Arsh-E-Buzurg Ka Malik Hai.

117

Aur Joh Shakhs Khuda Ke Sath Aur Maabood Ko Pukarta Hai Jis Ki Is Ke Paas Kuch Sanad Nahi, Toh Us Ka Hisaab Khuda Hi Ke Haan Hoga. Kuch Shak Nahi, Ke Kaafir Raasgaari Nahi Paaye Ge.

118

Aur Khuda Se Dua Karo Ke Mere Parwardigar Mujhe Bakhash De Aur Mujh Par Rehem Kar Aur Tu Sab Se Behtar Rehem Karne Wala Hai.

^^^^^^^^^^^^^^^^^^^^^^^