20-Soorah-e-Taa-ha-Aayaat-135

Soorah Ta-Ha

Aayaat 135

Shroo Allah Ke Naam Se Joh Bara Meherbaan Aur Nihayat Rehem Farmane Wala Hai.

1

Ta Ha

2

Ae Muhammad S.A.W. Ham Ne Tum Par Quraan Is Liye Nazil Nahi Kia Keh Tum Mushaqqat Main Par Jaao.

3

Balke Us Shakhs Ko Nasheehat Dene Ke Liye Nazil Kia Hai Joh Khof Rakhta Hai.

4

Yeh Us Zaat Ka Utara Hua Hai, Jis Ne Zameen Aur Oonche Oonche Aasmaan Banaye.

5

Yaani Khuda-E-Rehmaan, Jis Ne Arsh Par Qaraar Pakra.

6

Joh Kuch Aasmaanoun Main Hai Aur Joh Kuch Zameen Main Hai Aur Joh Kuch In Dono Ke Beech Main Hai Aur Joh Kuch Zameen Ki Maatti Ke Neeche Hai Sab Ussi Ka Hai.

7

Aur Agar Tum Pukaar Kar Baat Kaho, Toh Wo Toh Chupe Bhaid Aur Nihayat Posheeda Baat Tak Ko Jaanta Hai.

8

Wo Maabood Bar Haq Hai, Ke Us Ke Siwa Koi Maabood Nahi Hai. Us Ke Sab Naam Ache Hain.

9

Aur Kia Tumhain Moosa Ke Haal Ki Khabar Mili Hai.

10

Jab Unhoun Ne Aag Daikhi Toh Apne Ghar Ke Lougon Se Kaha, Keh Tum Yahan Thehro Main Ne Aag Daikhi Hai, Main Wahan Jata Hoon Shayad Is Main Se Main Tumhare Paas Angaari Laaon, Ya Aag Ke Maqaam Ka Rasta Maloom Kar Sakoon.

11

Jab Wahan Pohonche Toh Awaaz Aaye Ke Mossa.

12

Main Toh Tumhara Parwardigar Hoon, Toh Apni Jootiyan Utaar Do. Tum Yahan Paak Maidaan Yaani Toowa Main Ho.

13

Aur Main Ne Tumko Intikhaab Kar Lia Hai, Toh Joh Hukum Dia Jaye Usse Suno.

14

Be Shak Main Hi Khuda Hoon. Mere Siwa Koi Maabood Nahi Toh Meri Ibadat Kia Karo Aur Meri Yaad Ke Liye Namaaz Parha Karo.

15

Qiamat Yaqeenan Aane Wali Hai. Main Chahta Hoon Ke Us Ke Waqt Ko Posheeda Rakhoon, Taa-Ake Har Shakhs Joh Koshish Kare, Us Ka Badla Paaye.

16

Toh Joh Shakh Is Par Eemaan Nahi Rakhta Aur Apni Khuahish Ke Peeche Chalta Hai, Kahin Tum Ko Us Ke Yaqeen Se Rok Na De Toh Is Soorat Main Tum Halaak Ho Jao.

17

Aur Moosa Ye Tumhare Daahne Hath Main Kia Hai.

18

Unhoun Ne Kaha Ye Meri Laathi Hai. Is Par Main Sahara Lagata Hoon Aur Is Se Apni Bakriyoun Ke Liye Patte Jhaarta Hon Aur Is Main Mere Aur Bhi Kai Faaide Hain.

19

Farmaya Ke Moosa Ise Daal Do.

20

Toh Unhoun Ne Us Ko Daal Dia, Aur Wo Nagahaan Saamp Ban Kar Dorne Laga.

21

Khuda Ne Farmaya Ke Isse Pakar Lo Aur Darna Mat. Ham Is Ko Abhi Is Ki Pehli Halat Main Louta Dainge.

22

Aur Apna Hath Apni Baghal Se Laga Lo Wo Kisi Aib-O-Bimari Ke Bagair Safaid Chamakta Damakta Nikle Ga. Ye Doosri Nishani Hai.

23

Taa-Ake Ham Tumhain Apne Nishaanat-E-Azeem Dikhayen.

24

Tum Firown Ke Paas Jaao Keh Wo Sarkash Ho Raha Hai.

25

Kaha Mere Parwardigar Is Kaam Ke Liye Mera Seena Khol De.

26

Aur Mera Kaam Asaan Kar De.

27

Aur Meri Zabaan Ki Girrah Khol De.

28

Taa-Ake Wo Meri Baat Samajh Lain.

29

Aur Mere Ghar Waloun Main Se Aik Ko Mera Wazeer Yaani Madadgaar Muqarrar Farma.

30

Yaani Mere Bhai Haroon Ko.

31

Us Se Meri Quwwat Ko Mazboot Kar.

32

Aur Isse Mere Kaam Main Shareek Kar.

33

Taa-Ake Ham Teri Bohot Si Tasbeeh Karain.

34

Aur Tujhe Kasrat Se Yaad Karain.

35

Tu Ham Ko Har Haal Main Daikh Raha Hai.

36

Farmaya Moosa Tumhari Dua Qabool Ki Gai.

37

Aur Ham Ne Tum Par, Aik Baar Aur Bhi Ehsaan Kia Tha.

38

Jab Ham Ne Tumhari Walda Ko Ilhaam Kia Tha Joh Tumhain Bataya Jata Hai.

39

Wo Ye Tha Ke Usse Yani Moosa Ko Sandooq Main Rakho Phir Is Sandooq Ko Darya Main Daal Do, Toh Darya Is Ko Kinare Par Daal De Ga, Aur Mera Aur Us Ka Dushman Usse Utha Le Ga. Aur Moosa Main Ne Tum Par Apni Taraf Se Mohabbat Daal Di Hai, Is Liye Ke Tum Par Meherbaani Ki Jaye, Aur Is Liye Ke Tum Mere Saamne Parwarish Paao.

40

Jab Tumhari Behen Firown Ke Haan Gai Aur Kehne Lagi Ke Main Tumhain Aisa Shakhs Bataoon, Joh Us Ko Pale. Toh Is Tareeq Se Hamne Tumo Tumhari Maa Ke Pas Pohoncha Dia, Taa-Ake Un Ki Aankhain Thandi Houn Aur Wo Ranj Na Karian. Aur Tum Ne Aik Shakhs Ko Maar Daala Toh Ham Ne Tumko Gham Se Mukhlasi Di, Aur Ham Ne Tumhari Kai Baar Aazmaaish Ki. Phir Tum Kai Saal Ehl-E-Madeen Main Thehre Rahe. Phir Ae Moosa Tum Qaabliyat-E-Risaalat Ke Andaaze Par Aa Pohonche.

41

Aur Main Ne Tum Ko Apne Kaam Ke Liye Banaya Hai.

42

Toh Tum Aur Tumhara Bhai Dono Hamari Nishaniyan Le Kar Jaao, Aur Meri Yaad Main Sussti Na Karna.

43

Dono Firown Ke Paas Jao Wo Sarkahs Ho Raha Hai.

44

Aur Us Se Narmi Se Baat Karna Shayad Wo Gour Kare Ya Dar Jaye.

45

Dono Kehne Lage Ke, Hamare Parwardigar Hamain Khof Hai, Ke Ham Par Taa-Addi Karne Lage Ya Ziada Sarkash Ho Jaye.

46

Khuda Ne Farmaya Ke Daro Mat Main Tumhare Sath Hoon Aur Sunta Aur Daikhta Hon.

47

Acha Toh Us Ke Paas Jao Aur Kaho Ke Ham Aap Ke Parwardigar Ke Bhaije Hue Hain, Toh Bani Israail Ko Hamare Sath Jaane Ki Ijazat Dijieye. Aur Unhain Azaab Na Kijiye. Ham Aap Ke Paas Aap Ke Parwardigar Ki Taraf Se Nishani Le Kar Aaye Hain. Aur Joh Hidayat  Ki Baat Maane Us Ko Salamti Ho.

48

Hamari Taraf Ye Wahi Aaye Hai, Ke Joh Jhutlaye Aur Moonh Phaire, Us Ke Liye Azaab Taiyaar Hai.

49

Gharz Moosa Aur Haroon Firown Ke Paas Gaye Us Ne Kaha Ke Moosa Tumhara Parwardigar Koun Hai?

50

Kaha Keh Hamara Parwardigar Wo Hai Jis Ne Har Cheez Ko Us Ki Shakal-O-Soorat Bakhshi Phri Raah Dikhayee.

51

Kaha Toh Pehli Jamaatoun Ka Kia Haal?

52

Kaha Keh Un Ka Ilm Mere Parwardigar Ko Hai Joh Kitaab Main Likha Hua Hai. Mere Parwardigar Na Chookta Hai Na Bhoolta Hai.

53

Wo Hi Toh His Jis Ne Tum Logoun Ke Liye Zameen Ko Farsh Banaya, Aur Us Main Tumhare Liye Raste Jaari Kiye Aur Aasmaan Se Paani Barsaya. Phir Us Se Anwaa-O-Iqsaam Ki Mukhtalif Rooidgiyaan Paida Ki.

54

Ke Khud Bhi Khaao Aur Apne Chaar Paaiyoun Ko Bhi Charao. Beshak In Batoun Main Aqal Waaloun Ke Liye Bohot Si Nishaaniyan Hain.

55

Issi Zameen Se Ham Ne Tumko Paida Kia Aur Issi Main Tumhain Loutaayen Ge Aur Isse Se Doosri Dafa Nikaalian Ge.

56

Aur Ham Ne Firown Ko Apni Sab Nishaniyan Daikhayee Magar Wo Takzeeb Aur Inkar Hi Karta Raha.

57

Kehne Laga Ke Moosa Kia Tum Hamare Paas Is Liye Aaye Ho Ke Apne Jaado Ke Zor Se Hamain Hamre Mulk Se Nikaal Do.

58

Toh Ham Bhi Tumhare Muqabil Aisa Hi Jaado Laayen Ge, Toh Hamare Aur Apne Darmiyan Aik Waqt Muqarrar Kar Lo, Ke Na Toh Ham Us Ke Khilaf Karain Aur Na Tum Aur Ye Muqabla Aik Hamwaar Maidaan Main Hoga.

59

Moosa Ne Kaha Aap Ke Liye Youm-E-Zeenat Ka Waada Hai Aur Yeh Ke Loug Us Din Chaasht Ke Waqt Ikhatte Ho Jayen.

60

Toh Firown Lout Gaya Aur Apne Samaan Jama Kar Ke Phir Aaya.

61

Moosa Ne Un Jaadoo Garoun Se Kaha Ke Haaye Tumhari Kambakhti. Khuda Par Jhooti Iftiraa Na Karo Ke Wo Tumhain Azaab Se Fana Kar De Ga, Aur Jis Ne Iftiraa Kia Wo Na Muraad Raha.

62

Toh Wo Baham Apne Moaamle Main Jhagarne Aur Chupke Chupke Sargoshi Karne Lage.

63

Kehne Lage Ye Dono Jaadoo Gar Hain, Chahte Hain Ke Apne Jaado Ke Zor Se Tum Ko Tumhare Mulk Se Nikaal Dain Aur Tumhare Shaaishta Mazhab Ko Nabood Kar Dain.

64

Toh Tum Jaado Ka Samaan Ikhata Kar Lo, Aur Phir Qataar Baandh Kar Aao. Aaj Joh Ghaalib Raha Wo Hi Kamyab Hua.

65

Bole Ke Moosa Ya Toh Tum Apni Cheez Dalo Ya Ham Apni Cheezain Pehle Daalte Hain.

66

Moosa Ne Kaha Nahi Tum Hi Daalo. Jab Unhoun Ne Cheezain Daali Toh Nagaahan Un Ki Rassiyan Aur Laathiyaan Moosa Ke Khiyal Main Aisi Aane Lagee Ke Wo Maidaan Main Idhar Udhar Dour Rahi Hain.

67

Us Waqt Mosa Ne Apne Dil Main Khof Maloom Kia.

68

Ham Ne Kaha Khof Na Karo, Bila Shuba Tum Hi Ghaalib Ho.

69

Aur Joh Cheez Yaani Laathi Tumhare Daahne Hath Main Hai Usse Daal Do, Ke Joh Kuch Unhoun Ne Banaya Hai Us Ko Nigal Jaye Gi. Joh Kuch Unhoun Ne Banaya Hai Ye Toh Jaadoo Garoun Ke Hathkande Hain, Aur Jaado Gar Jahan Jaye Falah Nahi Paaye Ga.

70

Alqissa Youn Hi Hua, Toh Jadoogar Sajde Main Girr Pare Aur Kehene Lage Ke Ham Moosa Aur Haroon Ke Parwardigar Par Eemaan Laye.

71

Firown Bola Ke Paishtar Is Ke Main Tumhian Ijazat Doon, Tum Us Par Eemaan Le Aaye. Be Sak Wo Tumhara Bara Yaani Ustaad Hai Jis Ne Tumko Jaado Sikhaya Hai. So Main Tumahre Hath Aur Paaon Jaanib-E-Khilaf Se Katwa Doonga Aur Khajoor Ke Tannoun Par Sooli Charhwa Doonga, Us Waqt Tumko Maloom Hoga, Ke Ham Main Se Kis Ka Azaab Ziada Sakht Aur Dair Tak Rehne Wala Hai.

72

Unhoun Ne Kaha Ke Joh Dalaail Hamare Paas Aa Gaye Hain Un Par, Aur Jis Ne Hamko Paida Kia Hai Us Par, Ham Aap Ko Har Gizz Tarjeeh Nahi Dainge, Toh Aap Ko Joh Hukum Daina Ho De Deijiey. Aur Aap Joh Hukum De Sakte Hain Wo Sirf Issi Dunia Ki Zindagi Main De Sakte Hain.

73

Ham Apne Parwardigar Par Eemaan Le Aaye Taa-Ake Wo Hamare Gunnahoun Ko Moaaf Kare, Aur Usse Bhi Joh Aap Ne Ham Se Zabardasti Jaado Karaya. Aur Khuda Behtar Aur Baaqi Rehne Wala Hai.

74

Joh Shakhs Apne Parwardigar Ke Paas Gunnehgaar Ho Kar Aaye Ga, Toh Us Ke Liye Jahannum Hai. Jis Main Na Mare Ga Na Jiye Ga.

75

Aur Joh Us Ke Ru Baru Eemaandar Ho Kar Aaye Ga Aur Amal Bhi Naik Kiye Hounge, Toh Aise Logoun Ke Liye Oonche Oonche Darje Hain.

76

Yaani Hamesha Rehne Ke Baagh, Jinn Ke Neeche Nehrain Beh Rahi Hain. Hamesha Un Main Rahian Ge. Aur Ye Us Shakhs Ka Badla Hai Joh Paak Hua.

77

Aur Ham Ne Moosa Ki Taraf Wahi Bhaiji, Ke Hamre Bandoun Ko Raatoun Raat Nikaal Le Jao, Phir Un Ke Liye Darya Main Laathi Maar Kar Khushk Rasta Bana Do, Phir Tumko Na Toh Firown Ke  Aa Pakarne Ka Khof Hoga Aur Na Gharq Hone Ka Dar.

78

Phir Firown Ne Apne Lashkar Ke Sath Un Ka Taaqqub Kia Toh Darya Ki Mojoun Ne Un Par Charh Kar Unhain Dhaank Liya Yaani Dibo Dia.

79

Aur Firown Ne Apni Qoum Ko Gumraah Kar Dia Aur Seedhe Raste Par Na Daala.

80

Ae Aal-E-Yaqoob Ham Ne Tum Ko Tumhare Dushman Se Nijaat Di, Aur Touraat Dene Ke Liye Tum Se Koh-E-Toor Ki Daahni Taraf Muqarrar Ki, Aur Tum Par Man-O-Salwa Naazil Kia.

81

Aur Hukum Dia Ke Joh Paakeeza Cheezain Ham Ne Tumhain Di Hain, Un Ko Khaao. Aur Un Main Had Se Na Nikalna .Warna Tum Par Mera Ghazab Nazil Hoga. Aur Jis Par Mera Azaab Nazil Hua Wo Halaak Ho Gaya.

82

Aur Joh Touba Kare Aur Eemaan Laye Aur Amal-E-Naik Kare, Phir Seedhe Raste Chale Us Ko Main Bakhash Dene Wala Hoon.

83

Aur Ae Moosa Tum Ne Apni Qoum Se Aage Chale Aane Main Kion Jaldi Ki.

84

Kaha Wo Mere Peeche Aa Rahe Hain Aur Ae Parwardigar Main Ne Teri Taraf Aane Ki Jaldi Is Liye Ki Ke Tu Khush Ho.

85

Farmaya Ke Ham Ne Tumhari Qoum Ko, Tumhare Baad Aazmaaish Main Daal Dia Hai, Aur Saamri Ne Unko Behka Dia Hai.

86

Aur Moosa Ghusse Aur Gham Ki Halat Main Apni Qoum Ke Paas Wapas Aaye, Aur Kehne Lage Ke Ae Qoum Kia Tumhare Parwardigar Ne Tum Se Acha Waada Nahi Kia Tha, Kia Meri Judai Ki Muddat Tumhain Daraaz Maloomm Hui Ya Tum Ne Chaha Ke Tum Par Tumhare Parwardigar Ki Taraf Se Ghazab Nazil Ho. Aur Is Liye Tum Ne Mujh Se Jo Waada Kia Tha Us Ke Khilaaf Kia.

87

Wo Kehne Lage Ke Ham Ne Apne Ikhtiyar Se Tum Se Waada Khilaf Nahi Kia. Balke, Ham Lougon Ke Zaiwaroun Ka Bojh Uthaye Hue The. Phir Ham Ne Un Ko Aag Man Daal Diya Aur Ussi Tarha Saamri Ne Daal Dia.

88

Toh Us Ne Un Ke Liye Aik Bachra Bana Dia, Yaani Us Ka Qaalib, Jis Ki Awaaz Gaaye Ki Si Thi. Toh Loug Kehne Lage Ke Ye Hi Tumhara Maabood Hai Aur Ye Hi Mooosa Ka Maabood Hai. Magar Wo Bhool Gaye Hain.

89

Kia Ye Loug Nahi Daikhte Ke Wo Un Ki Kisi Baat Ka Jawab Nahi Deta. Aur Na Un Ke Nuqsaan Aur Nafa Ka Kuch Ikhtiyaar Rakhta Hai.

90

Aur Haroon Ne Un Se Pehle Hi Keh Dia Tha, Ke Lougo Is Se Sirf Tumhari Aazmaasih Ki Gai Hai. Aur Tumhara Parwardigar Toh Khdua Hai, Toh Meri Pairwi Karo Aur Mera Kaha Maano.

91

Wo Kehne Lage Ke, Jab Tak Moosa Hamare Paas Wapas Na Aayen Ham Toh Us Ki Pooja Par Qaaim Rahain Ge.

92

Phir Moosa Ne Haroon Se Kaha Ke Haroon Jab Tum Ne Unko Daikha Tha Ke Gumrah Ho Gaye Hain, Toh Tumko Kis Cheez Ne Roka.

93

Yaani Is Baat Se Ke Tum Mere Peeche Chale Aao.Bhala Tum Ne Mere Hukum Ke Khilaaf Kion Kia?

94

Kehne Lage Ke Bhaai Meri Daarhi Aur Sar Ke Baaloun Ko Na Pakariye. Main Toh Is Se Dara, Ke Aap Ye Na Kahain, Ke Tum Ne Bani Israail Main Taffarqa Daal Dia, Aur Meri Baat Ko Malhooz Na Rakha.

95

Phir Saamri Se Kehne Lage Ke Samri Tera Kia Haal Hai?

96

Us Ne Kaha Ke Main Ne Aisi Cheez Daikhi Joh Auron Ne Nahi Daikhi, Toh Main Ne Farishte Ke Naqsh-E-Pa Se Matti Ki Aik Muthi Bhar Li. Phir Us Ko Bachre Ke Qaalib Main Daal Dia Aur Mujhe Mere Ji Ne Is Kaam Ko Acha Bataya.

97

Moosa Ne Kaha Ja Tujh Ko Dunia Ki Zindagi Main Ye Saza Hai, Ke Kehta Rahe Ke Mujh Ko Hath Na Lagana Aur Tere Liye Aik Aur Waada Hai, Yaani Azaab Ka, Joh Tujh Se Tall Na Sake Ga Aur Jis Maabood Ki Pooja Par Tu Qaaim-O-Motakiff Tha Usko Daikh. Ham Usse Jala Dainge, Phir Us Ki Rakh Ko Ura Kar Darya Main Bakhair Dainge.

98

Tumhara Maabood Khuda Hi Hai, Jis Ke Siwa Koi Maabood Nahi. Us Ka Ilm Har Cheez Par Moheet Hai.

99

Is Tarha Ham Tum Se Wo Halat Bayan Karte Hain Joh Guzar Chuke Hain. Aur Ham Ne Tumhain Apne Pas Se Nasheehat Ki Kitaab Ata Farmai Hai.

100

Joh Shakhs Is Se Mooh Phaiae Ga Wo Qiamat Ke Din Gunnah Ka Bojh Uthaye Ga.

101

Aise Loug Hamesha Is Azaab Main Mubtila Rahian Ge, Aur Ye Bojh Qiamat Ke Roz Un Ke Liye Bura Hoga.

102

Jis Roz Soor Phoonka Jaye Ga, Aur Ham Gunnehgaaroun Ko Ikhata Karainge, Aur Un Ki Aankhain Neeli Neeli Houngi.

103

Toh Wo Apas Main Aahista Aahista Kahain Ge Ke Tum Dunia Main Sirf Das Hi Din Rahe Ho.

104

Joh Baatain Ye Karainge Ham Khoob Jante Hain. Un Waqt Un Main Se Achi Raah Wala, Yaani Aaqil-O-Hosh Mand Kahe Ga, Ke Nahi, Balke Sirf Aik Hi Roz Thehre Ho.

105

Aur Tum Se Paharoun Ke Bare Main Daryaft Karte Hain. Keh Do Ke Khuda Inko Ura Ka Bakhair De Ga.

106

Aur Zameen Ko Hamwaar Maidan Kar Chore Ga.

107

Jis Main Na Tum Kajji Aur Pasti Daikho Ge, Na Teela Aur Bulandi.

108

Us Roz Loug Aik Pukarne Wale Ke Peeche Chalainge Aur Us Ki Pariwi Se Inhiraaf Na Kar Sakain Ge, Aur Khdua Ke Saamne Aawaazain Past Ho Jayengi, Toh Tum Awaaz-E-Khafi Ke Siwa Koi Awaaz Na Suno Ge.

109

Us Roz Kisi Ki Sifarish Kuch Faaida Na De Gi, Magar Us Shakhs Ki Jisse Khuda Ijazat De Aur Us Ki Baat Ko Pasand Farmaye.

110

Joh Kuch Un Ke Aage Hai, Aur Joh Kuch Un Ke Peeche Hai Wo Us Ko Jaanta Hai Aur Wo Apne Ilm Se Khuda Ke Ilm Par Ihaata Nahi Kar Sakte.

111

Aur Us Zinda-O-Qaaim Ke Ru Baru Moonh Neeche Ho Jaye Ge. Aur Jis Ne Zulm Ka Bojh Uthaya Wo Na Muraad Raha.

112

Aur Joh Naik Kaam Kare Ga Aur Momin Bhi Hoga, Toh Us Ko Na Zulm Ka Khof Hoga Aur Na Nuqsaan Ka.

113

Aur Ham Ne Us Ko Ussi Tarah Ka Quraan-E-Arabi Nazil Kia Hai Aur Is Main Tarha Tarha Ke Daraawe Bayan Kar Diye Hain, Taa-Ake Loug Parhaiz Gaar Banain, Ya Khuda Un Ke Liye Naseehat Paida Kar De.

114

Toh Khuda Joh Sachha Baadsha Hai, Aali Qadar Hai. Aur Quraan Ki Wahi Joh Tumhari Taraf Bhaiji Jaati Hai, Us Ke Poora Hone Se Pehle Quraan Ke Parhne Ke Liye Jaldi Na Kia Karo, Aur Dua Karo Ke Mere Parwardigar Mujhe Aur Ziada Ilm De.

115

Aur Ham Ne Pehle Aadam Se Ehed Liya Tha, Magar Wo Usse Bhool Gaye Aur Ham Ne Un Main Sabar-O-Sabaat Na Daikha.

116

Aur Jab Ham Ne Farishtoun Se Kaha,  Ke Aadam Ke Aage Sajda Karo Toh Sab Sajde Main Girr Pare Magar Iblees Ne Inkar Kia.

117

Ham Ne Farmaya Ke Aadam Ye Tumhara Aur Tumhari Biwi Ka Dushman Hai, To Ye Kahin Tum Dono Ko Behshat Se Nikalwa Na De. Phir Tum Takleef Main Par Jaao.

118

Yahan Tum Ko Ye Aasaaish Hai, Ke Na Bhooke Raho Na Naange.

119

Aur Ye Ke Na Piyase Raho Aur Na Dhoop Khao.

120

Toh Shaitaan Ne Un Ke Dil Main Waswasa Daala. Aur Kaha Ke Aadam Bhala Main Tum Ko Aisa Darakhat Bataon Joh Hamesha Ki Zinadagi Ka Samrah De, Aur Aisi Baadshaahat Ke Kabhi Zaail Na Ho.

121

Toh Dono Ne Us Darakht Ka Phal Kha Liya, Toh Un Par Un Ki Sharamgaahian Zahir Ho Gayee. Aur Wo Apne Badanoun Par Behshat Ke Patthe Chupkane Lage. Aur Adam Ne Apne Parwardigar Ke Hukum Ke Khilaf Kia, Toh Wo Apne Matloob Se Be Rah Ho Gaye.

122

Phir Un Ke Parwardigar Ne Un Ko Nawaza, Toh Un Par Meherbani Se Tawajoh Farmaiye Aur Seedhi Raah Batayee.

123

Farmaya Ke Tum Dono Yahan Se Neeche Utar Jao. Tum Main Baaz Baaz Ke Dushman Hounge, Phir Agar Meri Taraf Se Tumhare Pas Hidayat Aaye, Toh Joh Shakhs Meri Hidayat Ki Pariwi Kare Ga, Wo Na Gumrah Hoga Aur Na Takleef Main Pare Ga.

124

Aur Joh Meri Naseehat Se Moonh Parhere Ga, Us Ki Zindagi Tang Ho Jaye Gi, Aur Qiamat Ko Ham Usse Andha Kar Ke Uthaye Ge.

125

Wo Kehe Ga Ke Mere Parwardigar Tu Ne Mujhe Andaha Kar Ke Kion Uthaya, Main Toh Daikhta Bhaalta Tha.

126

Khuda Farmaye Ga Ke Aisa Hi Chaahiye Tha, Tere Paas Hamari Aayatain Aayee, Toh Tu Ne Unko Bhula Dia. Issi Tarha Aaj Ham Tujh Ko Bhula Dainge.

127

Aur Joh Shakhs Had Se Nikal Jaye Aur Apne Parwaradigar Ki Aayatoan Par Eemaan Na Laye, Ham Us Ko Aisa Hi Badla Deta Hain. Aur Aakhrat Ka Azaab Bohot Sakht Aur Bohot Dair Rehne Wala Hai.

128

Kia Ye Baat Un Lougon Ke Liye Moojjab-E-Hidayat Na Hui Ke Ham Un Se Pehle Bohot Se Firqoun Ko Halak Kar Chuke Hain, Jin Ke Rehne Ke Maqamaat Main Ye Chalte Phirte Hain. Aqal Waaloun Ke Liye Is Main Bohot Si Nishaniyan Hain.

129

Aur Agar Aik Baat, Tumhare Parwardigar Ki Taraf Se Pehle Saadir Aur Jazaa-E-Aamaal Ke Liye Aik Miyaad Muqarrar Na Ho Chuki Hoti, Toh Nazool-E-Azaab Laazim Ho Jata.

130

Pas Joh Kuch Ye Bakwas Karte Hain, Us Par Sabar Karo. Aur Sooraj Ke Nikalne Se Pehle Aur Us Ke Gharoob Hone Se Pehle Apne Parwaradigaar Ki Tasbeeh-O-Temheed Kia Karo. Aur Raat Ki Sa-Aat-E-Awwaleen Main Bhi Us Ki Tasbeeh Kia Karo, Aur Din Ki Atraaf Yaani Dopeher Ke Qareeb Zohar Ke Waqt Bhi, Taa-Ake Tum Khush Ho Jao.

131

Aur Kai Tarha Ke Lougon Ko, Joh Ham Ne Dunia Ki Zindagi Main Aaraaish Ki Cheezoun Se Bhera Mand Kia Hai, Taa-Ake Un Ki Aazmaaish Karain, Un Par Nigah Na Karna. Aur Tumhare Parwardigar Ki Ata Farmayee Hui Rozi, Bohot Behtar Aur Baki Rehne Wali Hai.

132

Aur Apne Ghar Waloun Ko Namaz Ka Hukum Karo Aur Us Par Qaaim Raho. Ham Tum Se Rozi Ke Khuasgaar Nahi. Balke Tumhain Ham Rozi Dete Hain Aur Naik Anjaam Ehl-E-Taqwa Ka Hai.

133

Aur Kehte Hain, Ke Ye Paigambar Apne Parwardigar Ki Taraf Se Hamare Pas Koi Nishani Kion Nahi Late. Kia Un Ke Pas Pehli Kitaboun Ki Nishani Nahi Ayee?

  

134

Aur Ham Unko Paighambar Ke Bhaijne Se Paishtar Kisi Azaab Se Halak Kar Dete, Toh Wo Kehte Ke Ae Hamare Parwardigar Tu Ne Hamri Taraf Koi Paiganmbar Kion Na Bhaija, Ke Ham Zaleel Aur Ruswa Hone Se Pehle Tere Kalaam-O-Ehkaam Ki Pairwi Karte.

135

Keh Do Ke Sab Nataaij-E-Aamaal Ke Muntazir Hain So Tum Bhi Muntazir Raho. Anqareeb Tumko Maloom Ho Jaye Ga Ke Deen Ke Seedhe Raste Par Chalne Wale Koun Hain, Aur Jannat Ki Taraf Raah Paane Wale Koun Hain, Ham Ya Tum.

^^^^^^^^^^^^^^^^^^^^^^^^^^^^