Wednesday, 4 May 2016

28-Soorah-al-Qasas-Aayat-88




Soorah-Al-Qasas
Aayaat-88

Shroo Allah Ke Naam Se Joh Bara Meherbaan Aur Nihayat Rehem Farmane Wala Hai.

1
Tuaa Seen Meem.

2
Ye Kitaab-E-Roshan Ki Aayatain Hain

2
Ae Muhammad S.A.W. Ham Tumhain Moosa A.S. Aur Firown Ke Kuch Halaat Momin Lougon Ko Sunaane Ke Liye Sahee Sahee Sunaate Hain.

4
Keh Firown Ne Mulk Main Sar Utha Rakha Tha, Aur Wahan Ke Baashindoun Ko Giroh Giroh Bana Rakha Tha, Un Main Se Aik Guroh Ko Yahan Tak Kamzor Kar Dia Tha Ke Un Ke Baitoun Ko Zibaah Kar Daalta Aur Un Ki Larkiyoun Ko Zinda Rehne Deta. Beshak Wo Muffsidoun(Fisaad Paida Karne Walw) Main Tha.

5
Aur Ham Chahte The Ke Joh Loug Mulk Main Kamzor Kar Diye Gaye Hain Un Par Ehsaan Karain Aur Un Ko Paishwa Banayen Aur Unhain Mulk Ka Waaris Karain.

6
Aur Mulk Main Unko Qudrat Dain Aur Firown Aur Hamaan Aur Un Ke Lashkar Ko Wo Cheezain Dikha Dain Jis Se Wo Darte The.

7
Aur Ham Ne Moosa A.S. Ki Maan Ki Taraf Wahi Bhaiji, Ke Us Ko Doodh Pilaao, Jab Tum Ko Us Ke Bare Main Khud Khof Paida Ho, Toh Usse Darya Main Daal Dena Aur Na Toh Khof Karna Aur Na Ranj Karna. Ham Us Ko Tumhare Paas Wapas Pohoncha Dainge Aur Phir Usse Paigambar Bana Dainge.

8
Toh Firwon Ke Lougon Ne Us Ko Utha Liya, Is Liye Ke Natija Ye Hona Tha Ke Wo Un Ka Dushman Aur Un Ke Liye Moajjab-E-Gham Ho. Beshak Firwon Aur Hamaan Aur Un Ke Lashkar Chook Gaye.
9
Aur Firown Ki Biwi Ne Kaha Ke Ye Meri Aur Tumhri Dono Ki Aankhon Ki Thandak Hai Is Ko Qatal Na Karna. Shayad Ye Hamain Faaida Pohonchaye Ya Ham Isse Beta Bana Lain Aur Wo Anjaam Se Be Khabar The.

10
Aur Moosa A.S. Ki Maan Ka Dil Be Qaraar Ho Gaya, Agar Ham Un Ke Dil Mazboot Na Kar Dete Toh Qareeb Tha Ke Wo Is Qisse Ko Zahir Kar Dain.Gharz Ye Thi Ke Wo Mominoun Main Rahain.

11
Aur Us Ki Behen Se Kaha Ke Us Ke Peeche Peeche Chali Ja, Toh Wo Usse Door Se Daikhti Rahi Aur Un Lougon Ko Kuch Khabar Na Thi.

12
Aur Ham Ne Pehle Hi Se Us Par Daaiyoun Ke Doodh Haraam Kar Diye The. Toh Moosa A.S. Ki Behen Ne Kaha Ke Main Tumhain Aise Ghar Wale Bataoon, Ke Tumhare Liye Is Bache Ko Paalain Aur Is Ki Khair Kuahi Se Parwarish Karain.

13
Toh Ham Ne Is Tareeq Se Un Ko Un Ki Maan Ke Paas Wapas Pohoncha Dia Taa-Ake Un Ki Aankhain Thandi Houn Aur Wo Gham Na Khayen Aur Maaloom Karain Ke Khuda Ka Waada Sachha Hai, Lekin Ye Aksar Nahi Jaante.

14
Aur Jab Moosa A.S. Jawani Ko Pohonche Aur Bhar Poor Jawaan Ho Gaye Toh Ham Ne Un Ko Hikmat Aur Ilm Inayat Kia. Aur Ham Naiko Kaaroun Ko Aisa Hi Badla Dia
Karte Hain.

15
Aur Wo Aise Waqt Sheher Main Dakhil Hue Ke Wahan Ke Baashinde Be Khabar Ho Rahe The, Toh Daikha Ke Wahan Do Shakhs Lar Rahe Hain, Aik Toh Moosa A.S. Ki Qoum Ka Hai Aur Doosra Un Ke Dushmanoun Main Se, Toh Joh Shakh Un Ki Qoum Main Se Tha Us Ne Doosre Shakahs Ke Muqaable Main Joh Mooosa A.S. Ke Dushmanou Main Se Tha Madad Talab Ki Toh Un Houn Ne Us Ko Mukkka Maara Aur Us Ka Kaam Tamaam Kar Dia Kehne Lage Ke Ye Kaam Toh Aghwaaye Shaitaan Se Hua, Beshak Wo Insaan Ka Dushaman Aur Sareeh Behkaane Wala Hai.


16
Bole Ke Ae Parwardigar Main Ne Apne Aap Par Zulm Kia Tu Mujhe Bakhsh De Toh Khuda Ne Unko Bakhsh Di . Beshak Khuda Bakhshne Wala Meherbaan Hai.

17
Kehne Lage, Ke Ae Parwardigar Tu Ne Joh Mujh Par Meherbani Farmaayee Hai, Main Aainda Kabhi Gunnehgaaroun Ka Madadgaar Na Banoonga.

18
Algarz Subh Ke Waqt Sheher Main Darte Darte Dakhil Hue, Ke Daikhain Kia Hota Hai, Toh Nagahaan Wo Hi Shakhs Jis Ne Kal Un Se Madad Maangi Thi Phir Un Ko Pukaar Raha Hai. Moosa A.S. Ne Us Se Kaha Ke Tu Toh Sareeh Gumrahi Main Hai.

19
Jab Moosa A.S. Ne Iraada Kia Ke Us Shaks Ko Joh Un Dono Ka Dushaman Tha Pakar Lain, Toh Wo Yaani Moosa A.S. Ki Qoum Ka Aadmi Boul Utha, Ke Jis Tarha Tum Ne Kal Aik Shaks Ko Maar Dala Tha, Ussi Tarha Chahate Ho Ke Mujhe Bhi Maar Daalo. Tum Toh Ye Hi Chahte Ho , Ke Mulk Main Zulm-O-Sitam Karte Phiro Aur Ye Nahi Chahte Ke Naiko Kaaroun Main Ho.

20
Aur Aik Shakhs Sheher Ki Parli Taraf Se Dourta Hua Aaya Aur Bola Ke Moosa A.S. Sheher Ke Rayees Tumhare Bare Main Salaahain Karte Hain,  Ke Tum Ko Maar Daalain,  So Tum Yahan Se Nikal Jao. Main Tumhara Khair Khuah Hoon.

21
Moosa A.S. Wahan Se Darte Darte Nikal Khare Hue Ke Daikhain Kia Hota Hai Aur Dua Karne Lage Ke Ae Parwardigar Mujhe Zaalim Lougon Se Nijaat De.

22
Aur Jab Madyan Ki Taraf Rukh Kia Toh Kehne Lage Umeed Hai Ke Mera Parwardigar Mujhe Seedha Rasta Bataye.

23
Aur Jab Madyan Ke Paani Ke Maqaam Par Pohonche Toh Daikha Ke Wahan Loug Jama Ho Rahe, Aur Apne Chaar Paaiyoun Ko Paani Pila Rahe Hain,  Aur Un Ke Aik Taraf Do Aurtain Apni Bakriyoun Ko Roke Khari Hain. Moosa A.S. Ne Un Se Kaha Tumahra Kia Kaam Hai. Wo Boleen Ke Jab Tak Charwahe Apne Chaarpaaiyoun Ko Le Na Jaayen Ham Paani Nahi Pila Sakte Aur Hamare Waalid Bari Umar Ke Boorhe Hain.

24
Toh Moosa A.S. Ne Un Ke Liye Bakriyoun Ko Paani Pila Dia, Phir Saaye Ki Taraf Chale Gaye. Aur Kehne Lage Ke Parwardigaar Main Is Ka Mohtaaj Hoon Ke Tu Mujh Par Apni Naimat Nazil Farmaye.

25
Thori Dair Ke Baad Un Main Se Aik Aurat Joh Sharmati Aur Lijaati Chali Aati Thi Moosa A.S. Ke Paas Aayee Aur Kehne Lagi,  Ke Tum Ko Mere Waalid Bulate Hain, Ke Tumne Joh Hamare Liye Paani Pilyaya Tha Us Ki Tum Ko Ujjrat Dain. Jab Wo Un Ke Paas  Aaye Aur Un Se Apna Maajra Bayan Kia Toh Unhoun Ne Kaha Ke Kuch Khof Na Karo. Tum Zalim Lougon Se Bach Aaye Ho.

26
Aik Larki Boli Ke Abba In Ko Nokar Rakh Lijiye, Kion Ke Behtar Nokar Joh Ap Rakhain Wo Hai, Joh Tawana Aur Amanat Daar Ho.

27
Unhoun Ne Moosa A.S. Se Kaha Ke Main Chahta Hoon Apni In Do Baitiyoun Main Se Aik Ko Tum Se Biyah Doon, Is Ehed Par Ke Tum Aath Bararas(8years) Meri Khidmat Karo, Aur Agar Daas Saal Poore Kar Do Toh Tumhari Taraf Se Ehsaan Aur Main Tum Par Takleef Daalni Nahi Chahta. Tum Mujhe Inshallah Naik Lougon Main Paao Ge.

28
Moosa A.S. Ne Kaha Ke Mujh Main Aur Aap Main Aik Ehed Pukhta Hua, Main Jonsi Muddat Chahoon Poori Kar Doon, Phir Mujh Par Koi Ziaadti Na Ho.Aur Ham Joh Moaahida Karte Hain Khuda Us Ka Gawah Hai.

29
Jab Moosa A.S. Ne Muddat Poori Kar Di Aur Apne Ghar Ke Lougon Ko Le Kar Chale Toh Toor Ki Taraf Se Aag Dikhaye Di, Toh Apne Ghar Waloun Se Kehne Lage Ke Tum Yahan Thehro. Mujhe Aag Nazar Aaye Hai Shayad Wahan Se Raaste Ka Kuch Pata Laaon, Ya Aag Ka Angaara Le Aaaon Taa-Ake Tum Toh Taapo.

30
Jab Us Ke Paas Pohonche Toh Maidaan Ke Daayen Kinare Se Aik Mubarak Jaga Main Aik Darakht Main Se Awaaz Aaye Ke Moosa A.S. Main Toh Khuda-E-Rabb-Ul-Aalmeen Hoon.



31
Aur Ye Ke Apni Lathi Dal Do. Jab Daikha Ke Wo Harkat Kar Rahi Hai Goya Saamp Hai, Toh Peeth Phair Kar Chal Diye Aur Peeche Murr Kar Bhi Na Daikha. Ham Ne Kaha Ke Moosa A.S. Aage Aao Aur Daro Mat Tum Aman Paane Waloun Main Ho.

32
Apna Hath Girebaan Main Dalo Toh Bagair Kisi Aib Ke Safaid Nikal Aaye Ga Aur Khof Door Hone Ki Waja Se Apne Baazu Ko Apni Taraf Sukair Lo . Ye Do Daleelain Tumhare Parwardigaar Ki Taraf Se Hain, Un Ke Sath Firown Aur Us Ke Darbaariyoun Ke Paas Jaao Ke Wo Nafarmaan Loug Hain.

33
Moosa A.S. Ne Kaha Ae Parwardigar Un Main Aik Shakhs Mere Hath Se Qatal Ho Chukka Hai, So Mujhe Khof Hai Ke Wo Kahin Mujh Ko Maar Na Daalain.

34
Aur Haaroon A.S. Joh Mera Bhai Hai Us Ki Zabaan Mujh Se Ziada Faseeh Hai Tu Us Ko Mere Sath Madadgaar Bana Kar Bhaij Ke Meri Tasdeeq Kare Mujhe Khof Hai Ke Wo Loug Meri Takzeeb Karain Ge.

35
Khuda Ne Farmaya Ham Tumhare Bhai Se Tumhare Baazu Ko  Mazboot Karainge, Aur Tum Dono Ko Ghalba Dainge, Toh Hamrai Nishaniyoun Ke Sabab Wo Tum Tak Pohonch Na Sakain Ge Aur Tum Aur Jinhoun Ne Tumhari Pairwi Ki Ghalib Raho Ge.

36
Aur Jab Moosa A.S. Un Ke Paas Hamari Khuli Nishaniya Le Kar Aaye Toh Wo Kehne Lage Ke Ye Jaadu Hai, Joh Us Ne Bana Khara Kia Hai Aur Ye Baatain Ham Ne Apne Agle Bap Dada Main Toh Kabhi Suni Nahi.

37
Aur Mosa A.S. Ne Kaha Ke Mera Parawardigar Us Shaksh Ko Khoob Jaanta Hai, Joh Us Ki Taraf Se Haq Le Kar Aaya Hai, Aur Jis Ke Liye Aaqbat Ka Ghar Yaani Behshat Hai. Beshak Zalim Nijaat Nahi Paayen Ge.

38
Aur Firown Ne Kaha Ke Ae Ehl-E-Darbaar Main Tumhara Apne Siwa Kisi Ko Khuda Nahi Jaanta Toh Hamaan Mere Liye Gaare Ko Aag Lagwa Kar Eentain Paka Do Phir Aik Ooncha Mehel Banwa Do Taa-Ake Main Moosa A.S. Ke Khuda Ki Taraf Charh Jaaon Aur Main Toh Usse Jhooota Samajhta Hoon.

39
Aur Wo Aur Us Ke Lashkar Mulk Main Nahaq Maghroor Ho Rahe The Aur Khayal Karte The Ke Wo Hamari Taraf Lout Kar Nahi Aayenge.

40
Toh Ham Ne Un Ko Aur Un Ke Lashkaroun Ko Pakar Liya Aur Darya Main Daal Dia.So Daikh Lo Ke Zaalimoun Ka Kaisa Anjaam Hua.

41
Aur Ham Ne Un Ko Paishwa Banaya Tha, Wo Lougon Ko Dozakh Ki Taraf Bulate The Aur Qiamat Ke Din Un Ko Madad Nahi Ki Jaye Gi.

42
Aur Is Dunia Main Ham Ne Un Ke Peeche Laanat Laga Di, Aur Wo Qiamat Ke Roz Bhi Bad Haaloun Main Hounge.

43
Aur Ham Ne Pehli Ummatoun Ke Halak Karne Ke Baad Moosa A.S. Ko Kitaab Di,  Joh Lougon Ke Liye Baseerat Aur Hidayat Aur Rehmat Hai Taa-Ake Wo Naseehat Pakrain.

44
Aur Jab Ham Ne Moosa A.S. Ki Taraf Hukum Bhaija Toh Tum Toor Ki Gharab Ki Taraf Nahi The Aur Na Us Waaqeiye Ke Daikhne Waloun Main The.

45
Lekin Ham Ne Moosa A.S. Ke Baad Kai Ummatoun Ko Paida Kia Phir Un Par Muddat-E-Taweel Guzar Gai Aur Na Tum Madyan Waloun Main Rehne Wale The Ke In Ko Hamari Aayatain Parh Parh Kar Sunate The .Haan Ham Hi Toh Paigambar Bhaijne Wale The.

46
Aur Na Tum Us Waqt, Jab Ke Ham Ne Moosa A.S. Ko Awaaz Di Toor Ke Kinaare The, Balke Tumahra Bhaija Jaana Tumhare Parwardigar Ki Rehmat Hai, Taa-Ake Tum Un Lougon Ko Jin Ke Paas Tum Se Pehle Koi Hidayat Karne Wala Nahi Aaya Hidayat Karo Taa-Ake Wo Naseehat Pakrain.

47
Aur Ae Paigambar S.A.W. Ham Ne Tum Ko Is Liye Bhaija Hai Ke Aisa Na Ho Ke Agar In Aamaal Ke Sabaab Joh Un Ke Hath Aage Bhaij Chuke Hain Un Par Koi Museebat Waaqe Ho, Toh Ye Kehne Lagain Ke Ae Parwardigar Tu Ne Hamari Taraf  Koi Paigambar Kion Na Bhaija Ke Ham Teri Aayatoun Ki Pairwi Karte Aur Eemaan Laane Waloun Main Hote.
48
Phir Jab Un Ke Pas Hamari Taraf Se Haq Aa Pohoncha Toh Kehne Lage Ke Jaisi Nishaniyan Moosa A.S. Ko Mili Theen, Waisi Is Ko Kion Nahi Milee. Kia Joh Nishaniyan Pehle Moosa A.S. Ko Di Gai Theen Unhoun Ne Un Se Kufur Nahi Kia,  Kehne Lage Ke Dono Jaadu Gar Hain Aik Dooser Ke Mawafiq .Aur Bole Ke Ham Sab Se Munkir Hain.

49
Keh Do Ke Agar Sache Ho Toh Tu Khuda Ke Paas Se Koi Aur Kitaab Le Aao Joh In Dono Kitaaboun Se Barh Kar Hidayat Karne Wali Ho. Taa-Ake Main Bhi Ussi Ki Pairwi Karoon.

50
Phir Agar Ye Tumhari Baat Qabool Na Karain,  Toh Jaan Lo Ke Ye Sirf Apni Khuahishoun Ki Pairwi Karte Hain. Aur Us Se Ziada Koun Gumraah Hoga Joh Khuda Ki Hidayat Ko Chor Kar Apni Khuahish Ke Peeche Chale. Beshak Khuda Zaalim Lougn Ko Hidayat Nahi Deta.

51
Aur Ham Pae Dar Pae Un Lougon Ke Paas Hidayat Ki Batain Bhaijte Rahe Hain Taa-Ake Naseehat Pakrain.

52
Jin Lougon Ko Ham Ne Is Se Pehle Kitaab Di Thi, Wo Us Par Eemaan Le Aate Hain.

53
Aur Jab Quraan Un Ko Parh Kar Sunaya Jata Hai Toh Kehte Hain Ke Ham Is Par Eemaan Le Aaye Be Shak Wo Hamare Parwardigar Ki Taraf Se Bar Haq Hai Aur Ham Toh Is Se Pehle Ke Hukum Bardar Hain.

54
Un Lougon Ko Dugna Badla Dia Jaye Ga,  Kion Ke Sabar Karte Rahe Hain Aur BhalayEe Ke Sath Burai Ko Door Karte Hain Aur Joh Maal Ham Ne Un Ko Dia Hai Is Main Se Kharch Karte Hain.

55
Aur Jab Yahood Baat Sunte Hain Toh Is Main Moonh Phair Lete Hain Aur Kehte Hain Ke Ham Ko Hamare Aamaal Aur Tum Ko Tumhare Aamal. Tumko Salam .Ham Jaahiloun Ke Khuaastgaar Nahi Hain.



56
Ae Muhammad S.A.W. Tum Jis Ko Dost Rakhte Ho Usse Hiddayat Nahi Kar Sakte,  Balke Khuda Hi Jis Ko Chahta Hai Hidayat Karta Hai Aur Wo Hidayat Paane Waloun Ko Khoob Jaanta Hai.

57
Aur Kehte Hain Ke Agar Ham Tumhare Sath Hidayat Ki Pairwi Karain,  Toh Apne Mulk Se Uchak Liye Jaayen. Kia Ham Ne Un Ko Haram Main Joh Aman Ka Maqaam Hai Jaga Nahi Di. Jahan Har Qisam Ke Mewe Pohonchaye Jate Hain Aur Ye Rizq Hamari Taraf Se Hai Lekin Un Main Se Aksar Nahi Jaante.

58
Aur Ham Ne Bohot Si Bastiyoun Ko Halak Kar Daala Joh Apni Faraakh Maeeshat Main Ittra Rahe The. So Ye Un Ke Makanaat Hain Joh Un Ke Baad Aabaad Hi  Nahi Hue,  Magar Bohot Kam. Aur Un Ke Peeche Ham Hi Un Ke Waris Hue.

59
Aur Tumhara Parwardigar Bastiyoun Ko Halak Nahi Kia Karta. Jab Tak Un Ke Bare Sheher Main Paigamabar Na Bhaij De, Joh Un Ko Hamari Aayatain Parh Parh Kar Sunaye Aur Ham Bastiyoun Ko Halak Nahi Kia Karte, Magar Is Halat Main Ke Wahan Ke Baashinde Zalim Houn.

60
Aur Joh Cheez Tum Ko Di Gai Hai Wo Dunia Ki Zindagi Ka Faaida Aur Us Ki Zeenat Hai. Aur Joh Khuda Ke Paas Hai Wo Behtar Aur Baqi Rehne Wali Hai. Kia Tum Samajhte Nahi?

61
Bhala Jis Shakhs Se Ham Ne Naik Waada Kia Aur Us Ne Usse Hasil Kar Liya Toh Kia Wo us Shakhs Ka Sa Hai, Jis Ko Ham Ne Dunia Ki Zindagi Ke Faaide Se Behra Mand Kia, Phir Wo Qiamat Ke Roz Un Lougon Main Ho Joh Hamare Ru Baru Hazir Kiye Jayen Ge.

62
Aur Jis Roz Khuda Un Ko Pukare Ga Aur Kahe Ga Ke Mere Wo Shareek Kahan Hain Jin Ka Tumhain Daawa Tha.






63
Toh Jin Lougon Par Azaab Ka Hukum Saabit Ho Chukka Hoga, Wo Kahain Ge Ke Hamare Parwardigar Ye Wo Loug Hain, Jin Ko Ham Ne Gummrah Kia Tha. Aur Jis Tarha Ham Khud Gumrah Hue The, Ussi Tarha Un Ko Gumraah Kia Tha Ab Ham Teri Taraf Muttwajoh Ho Kar, Un Se Baizaar Hote Hain Ye Hamain Poojte The.

64
Aur Kaha Jaye Ga Ke Apne Shareekoun Ko Bulaao. Toh Wo Un Ko Pukaarain Ge Aur Wo Un Ko Jawab Na De Sakain Ge Aur Jab Azaab Ko Daikh Lainge Toh Tammana Karain Ge Ke Kaash Wo Hidayat Yaab Hote.

65
Aur Jis Roz Khuda Un Ko Pukare Ga Aur Kahe Ga Ke Tum Ne Paigambaroun Ko Kia Jawab Dia.

66
Toh Wo Us Roz Khabroun Se Andhe Ho Jaye Ge, Aur Apas Main Kuch Bhi Pooch Na Sakainge.

67
Lekin Jis Ne Touba Ki Aur Eemaan Laaya Aur Amal-E-Naik Kiye Toh Umeed Hai Ke Wo Nijaat Paane Waloun Main Ho.

68
Aur Tumhara Parwardigar Joh Chahata Hai Paida Karta Hai Aur Jisse Chahta Hai Barguzeeda Kar Leta Hai. Un Ko Is Ka Ikhtiyaar Nahi Hai. Ye Joh Shirk Karte Hain Khuda Us Se Paak-O-Balatar Hai.

69
Aur Un Ke Seene Joh Kuch Makhfi Karte Aur Joh Ye Zahir Karte Hain Tumhara Parwardigar Us Ko Jaanta Hai.

70
Aur Wo Hi Khuda Hai Us Ke Siwa Koi Maabood Nahi Dunia Aur Aakhrat Main Ussi Ki Taareef Hai Aur Ussi Ka Hukum Aur Ussi Ki Taraf Tum Loutaye Jaao Ge.

71
Kaho Bhala Daikho Toh Aagar Khuda Tum Par Hamesha Qiamat Ke Din Tak Raat Ki Taareeki Kiye Rahe, Toh Khuda Ke Siwa Koun Maabood Hai Joh Tum Ko Roshni Laa De, Toh Kia Tum Sunte Nahi.

72
Kaho Toh Bhala Daikho Toh Agar Khuda Tum Par Hamesha Qiamat Tak Din Kiye Rahe Toh Khuda Ke Siwa Koun Maabood Hai Ke Tum Ko Raat La De, Jis Main Tum Araam Karo. Toh Kia Tum Daikhte Nahi?

73
Aur Us Ne Apni Rehmat Se Tumhare Liye Raat Ko Aur Din Ko Banaya Taa-Ake Tum Us Main Araam Karo Aur Us Main Us Ka Fazal Talash Karo Aur Taa-Ake Shukar Karo.

74
Aur Jis Din Wo Un Ko Pukare Ga Aur Kahe Ga Ke Mere Wo Shareek Jin Ka Tumhain Daawa Tha Kahan Hain?

75
Aur Ham Har Aik Ummat Main Se Gawaah Nikaal Lainge, Phir Kahainge Ke Apni Daleel Paish Karo, Toh Wo Jaan Lainge Ke Sach Baat Khuda Ki Hai Aur Joh Wo Iftiraa Kia Karte The Un Se Jaata Rahe Ga.

76
Qaaroon Moosa A.S. Ki Qoum Main Se Tha Aur Un Par Taa-ddi Karta Tha. Aur Ham Ne Us Ko Itne Khazane Diye The Ke Un Ki Kunjiyaan Aik Taaqatwar Jamaat Ko Uthaani Mushkil Hoteen, Jab Us Se Us Ki Qoum Ne Kaha Ke Ittraaiye Mat .Keh Khuda Ittraane Waloun Ko Pasand Nahi Karta.

77
Aur Joh Maal Tum Ko Khuda Ne Ata Farmaya Hai Us Se Aakhrat Ki Bhalayee Talab Kijiye Aur Dunia Se Apna Hissa Na Bhulaaiye Aur Jaisi Khuda Ne Tum Se Bhalai Ki Hai Waisi Tum Bhi Lougon Se Bhalayee Karo. Aur Mulk Main Taalib-E-Fisaad Na Ho. Kion Ke Khuda Fisaad Karne Walun Ko Dost Nahi Rakhta.

78
Bola Ke Ye Maal Mujhe Meri Daanish Ke Zor Se Mila Hai,  Kia Us Ko Maaloom Nahi Ke Khuda Ne Is Se Pehle Bohot Si Ummatain Joh Us Se Quwwat Main Barh Kar Aur Jameeyat Main Baishtar Theen Haalk Kar Daali Hain Aur Gunnehgaaroun Se Un Ke Gunnahoun Ke Bare Main Poocha Nahi Jayega.





79
Toh Aik Roz Qaaroon Bari Aaraaish Aur Thaath Se Apni Qoum Ke Saamne Nikl . Joh Loug Dunia Ki Zindagi Ke Taalib The Kehne Lage Ke Jaisa Maal-O-Mataa Qaroon Ko Mila Hai Kaash Aisa Hi Hamain Bhi Mile. Wo Toh Bara Hi Sahib-E-Naseeb Hai.

80
Aur Jin Lougon Ko Ilm Dia Gaya Tha Wo Kehne Lage Ke Tum Par Afsos .Mominoun Aur Naiko Kaaroun Ke Liye Toh Sawab Khuda Ke Haan Taiyaar Hai, Wo Kahin Behtar Hai Aur Wo Sirf Sabar Karne Waloun Hi Ko Mile Ga.

81
Pas Ham Ne Qaaroon Ko Aur Us Ke Ghar Ko Zameen Main Dhanasa Dia Toh Khuda Ke Siwa Koi Jamaat Us Ki Madadgaar Na Ho Saki. Aur Na Wo Badla Le Saka.

82
Aur Wo Loug Joh Kal Us Ke Rutbe Ki Tammanna Karte The,  Subho Ko Kehne Lage Haaye Shamat!  Khuda Hi Toh Apne Bandoun Main Se Jis Ke Liye Chahta Hai Rizq Faraaakh Kar Deta Hai Aur Jis Ke Liye Chahta Hai Tang Kar Deta Hai. Agar Khuda Ham Par Ehsaan Na Karta, Toh Hamain Bhi Dhansa Deta. Haaye Kharabi!  Kaafir Nijaat Nahi Paa Sakte.

83
Wo Joh Aakhrat Ka Ghar Hai Ham Ne Usse Un Louogn Ke Liye Taiyaar Kar Rakha Hai Joh Mulk Main Zulm Aur Fisaad Ka Iraada Nahi Rakhte Aur Anjaam Naik Toh Parhaizgaaroun Hi Ka Hai.

84
Joh Shakhs Naiki Le Kar Aaye Ga Us Ke Liye Is Se Behtar Sila Mojood Hai Aur Joh Buraaiye Laaye Ga,  Toh Jin Lougon Ne Bure Kaam Kiye Un Ko Badla Bhi Ussi Tarha Ka Mile Ga Jis Tarha Ke Wo Kaam Karte The.

85
Ae Paigambar S.A.W. Jis Khuda Ne Tum Par Quraan Ke Ehkaam Ko Farz Kia Hai Wo Tumhain Baazgasht Ki Jaga Louta De Ga. Keh Do Ke Mera Parwardigar Us Shaksh Ko Bhi Khoob Jaanta Hai, Joh Hidayat Le Kar Aaya Aur Us Ko Bhi Joh Sareeh Gumraahi Main Hai.

86
Aur Tumhain Umeed Na Thi Ke Tum Par Ye Kitaab Nazil Ki Jaye Gi.Magar Tumhare Parwardigar Ki Meherbaani Se Naazil Hui Toh Tum Har Gizz Kaafiroun Ke Madadgar Na Hona.
87
Aur Wo Tumhain Khuda Ki Aayatoun Ki Tableegh Se, Baad Is Ke Keh Wo Tum Par Nazil Ho Chuki Hai,  Rok Na Dain Aur Apne Parwardigar Ko Pukarte Raho Aur Mushrikoun Main Har Gizz Na Ho Jaaiyo.

88
Aur Khuda Ke Sath Kisi Aur Ko Maabood  Samajh Kar Na Pukarna Us Ke Siwa Koi Maabood Nahi. Us Ki Zaa-E- Paak Ke Siwa Har Cheez Fana Hone Wali Hai. Ussi Ka Hukum Hai Aur Ussi Ki Taraf Tum Lout Kar Jaaoge.

^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^
Posted by at No comments:
Labels:

29-Soorah-al-Ankaboot-Aayat-69



Soorah Al-Ankaboot
Aayaat 69

Shroo Allah Ke Naam Se Joh Bara Meherbaan Aur Nihayat Rehem Farmane Wala Hai.

1
Alif Laam Meem.

2
Kia Loug Ye Khayal Kiye Hue Hain Ke Sirf Ye Kehne Se Ke Ham Eemaan Le Aaye, Chor Diye Jaayen Ge Aur Un Ki Aazmaaish Nahi Ki Jaye Gi.

3
Aur Joh Loug Un Se Pehle Ho Chuke Hain, Ham Ne Un Ko Bhi Aazmaaya Tha Aur Un Ko Bhi Aazmaayen Ge, So Khuda Un Ko Zaroor Maaloom Kare Ga Joh Apne Eemaan Main Sachhe Hain Aur Un Ko Bhi Joh Jhoote Hain.

4
Kia Wo Loug Joh Bure Kaam Karte Hain Ye Samajhe Hue Hain Ke Ye Hamare Qaaboo Se Nikal Jaayen Ge. Joh Khayal Ye Karte Hain Bura Hai.

5
Joh Shakhs Khuda Ki Mulaqaat Ki Umeed Rakhta Ho, Toh Khuda Ka Muqarrar Kia Hua Waqt Zaroor Aane Wala Hai. Aur Wo Sunn-Ne Wala Aur Jaan-Ne Wala Hai.

6
Aur Joh Shakhs Mehnat Karta Hai Toh Apne Hi Faaide Ke Liye Mehnat Karta Hai. Aur Khuda Toh Saare Jahan Se Be Parwah Hai.

7
Aur Joh Loug Eemaan Laye Aur Naik Amal Kartre Rahe Ham Un Ke Gunaahoun Ko Un Se Door Kar Dainge Aur Un Ko Un Ke Aamaal Ka Bohot Acha Badla Dainge.

8
Aur Ham Ne Insaan Ko Apne Maan Baap Ke Sath Naik Salook Karne Ka Hukum Dia Hai. Ae Mukhatib Agar Tere Maan Baap Tere Dar Pe Houn,  Ke Tu Mere Sath Kisi Ko Shareek Banaye, Jis Ki Haqeeqat Ki Tujhe Waaqfiyat Nahi. Toh Un Ka Kehna Na Maaniyo. Tum Sab Ko Meri Taraf Lout Kar Aana Hai.Phir Joh Kuch Tum Karte The Main Tum Ko Jata Doonga.
9
Aur Joh Loug Eemaan Laaye Aur Naik Amal Karte Rahe Unko Ham Naik Lougon Main Dakhil Karain Ge.

10
Aur Baaz Loug Aise Hain, Joh Kehte Hain Ke Ham Khuda Par Eemaan Laaye, Jab Un Ko Khuda Ke Raste Main Koi Eezaa Pohonchti Hai, Toh Lougon Ki Eeza Ko Youn Samajhte  Hain Jaise Khuda Ka Azaab. Aur Agar Tumhre Parwardigar Ki Taraf Se Madad Pohonche Toh Kehte Hain Ke Ham Toh Tumahre Sath The. Kia Joh Ehle-E-Aalam Ke Seenoun(Hearts) Main Hai Khuda Us Se Waaqif Nahi?

11
Aur Khuda Un Ko Zarooor Maaloom Kare Ga Joh Sache Momin Hain Aur Munaafiqoun Ko Bhi Maaloom Kar Ke Rahe Ga.

12
Aur Joh Kaafir Hain Wo Mominoun Se Kehte Hain Ke Hamre Tareeq Ki Pairwi Karo. Ham Tumahre Gunnah Utha Lainge. Halanke Wo Un Ke Gunaahoun Ka Kuch Bhi Bojh Uthane Wale Nahi. Kuch Shak Nahi Ke Ye Jhoote Hain.

13
Aur Ye Apne Bojh Bhi Uthayen Ge Aur Apne Bojhoun Ke Sath Aur Lougon Ke Bojh Bhi. Aur Joh Bohtaan Ye Baandhte Rahe Qiamat Ke Din Un Ki Un Se Zaroor Purrsissh Hogi.

14
Aur Ham Ne Nooh A.S. Ko Un Ki Qoum Ki Taraf Bhaija Toh Wo Un Main Pachaas Baras Kam, Hazar Baras Rahe, Phir Un Ko Toofaan Ke Azaab Ne Aa Pakra.Aur Wo Zalim The.

15
Phir Ham Ne Nooh A.S. Ko Aur Kashti Waaloun Ko Nijaat Di Aur Kashti Ko Ehl-E-Aalam Ke Liye Nishaani Bana Dia.

16
Aur Ibrahim A.S. Ko Yaad Karo, Jab Unhoun Ne Apni Qoum Se Kaha Ke Khuda Ki Ibadat Karo, Aur Us Se Daro, Agar Tum Samajh Rakhte Ho Toh Ye Tumahre Haq Main Behtar Hai.




17
Tum Toh Khdua Ko Chor Kar Buttoun Ko Poojte Aur Toofaan Baandhte Ho Toh Jin Lougon Ko Tum Khuda Ke Siwa Poojte Ho, Wo Tumko Rizq Dene Ka Ikhtiyaar Nahi Rakhte,  Pas Khuda Hi Ke Haan Se Rizq Talab Karo Aur Ussi Ki Ibadat Karo Aur Ussi Ka Shukar Karo, Ussi Ki Taraf Tum Lout Kar Jao Ge.

18
Aur Agar Tum Meri Takzeeb Karo, Toh Tum Se Pehle Bhi Ummatain Apne Paigambaroun Ki Takzeeb Kar Chuki Hain. Aur Paigambar Ke Zimme Khol Kar Suna De Ne Ke Siwa Aur Kuch Nahi.

19
Kia Unhoun Ne Nahi Daikha Ke Khuda Kis Tarha Khalqat Ko Pehli Baar Paida Karta Phir Kis Tarha Us Ko Baar Baar Paida Karta Rehta Hai. Ye Khuda Ko Aasan Hai.

20
Keh Do Ke Mulk Main Chalo Phiro Aur Daikho Ke, Us Ne Kis Tarha Khlaqat Ko Pehli Dafa Paida Kia Hai, Phir Khuda Hi Pichli Paidaaish Paida Kare Ga. Be Shak Khuda Har Cheez Par Qaadir Hai.

21
Wo Jisse Chahe Azaab De Aur Jis Par Chaahe Rehem Kare.Aur Ussi Ki Taraf Tum Loutaye Jaao Ge.

22
Aur Tum Us Ko Na Zameen Main Aajiz Kar Sakte Ho,  Na Asmaan Main Aur Na Khuda Ke Siwa Tumhara Koi Dost Hai Aur Na Madadgaar.

23
Aur Jin Lougon Ne Khuda Ki Aayatoun Se Aur Us Ke Milne Se Inkaar Kia Wo Meri Rehmat Se Na Umeed Ho Gaye Hain,  Aur Un Ko Dard Dene Wala Azaab Hoga.

24
Toh Un Ki Qoum Ke Loug Jawab Main Bole Toh Ye Bole Ke Isse Maar Daalo Ya jala Do. Magar Khuda Ne Unko Aag Ki Sozish Se Bacha Liya. Joh Loug Eemaan Rakhte Hain Un Ke Liye Is Main Nishaniyan Hain.





25
Aur Ibrahim A.S. Ne Kaha Ke Tum Joh Khuda Ko Chor Kar Buttoun Ko Le Baithe Ho Toh Dunia Ki Zindagi Main Baaham Dosti Ke Liye,  Magar Phir Qiamat Ke Din Aik Doosre Ki Dosti Se Inkar Kar Do Ge, Aur Aik Doosre Par Laanat Bhaijo Ge,  Aur Tumhara Thikana Dozakh Hoga Aur Koi Tumhara Madadgaar Na Hoga.

26
Pas Un Par Aik Loot A.S. Eemaan Laaye Aur Ibrahim A.S. Kehne Lage Ke Main Apne Parwardigar Ki Taraf Hijrat Karne Wala Hoon.Beshak Wo Ghaalib Hikmat Wala Hai.

27
Aur Ham Ne Us Ko Ishaaq A.S. Aur Yaqoob A.S. Bakhshe Aur Un Ki Aulaad Main Paigambari Aur Kitaaab Muqarrar Kar Di,  Aur Un Ko Dunia Main Bhi Un Ka Sila Inayat Kia Aur Wo Aakhrat Main Bhi Naik Lougon Main Hounge.

28
Aur Loot A.S. Ko Yaad Karo Jab Unhoun Ne Apni Qoum Se Kaha Ke Tum Ajaab Be Haayaee Ke Murtakib Hote Ho. Tum Se Pehle Ehl-E-Aalam Main Se Kisi Ne Aisa Kaam Nahi Kia.

29
Kia Tum Lazzat Ke Iraade Se Loundoun Ki Taraf  Maail Hote Aur Musaafiroun Ki Rahzani Karte Ho Aur Apni Majlisoun Main Na Pasandeeda Kaam Karte Ho. Toh Un Ki Qoum Ke Loug Jawab Main Bole Toh Ye Bole Ke Agar Tum Sache Ho Toh Ham Par Azaab Le Aao.

30
Loot A.S. Ne Kaha Ke Ae Mere Parwardigar In Muffsid Lougon Ke Muqaable Main Mujhe Nusrat Inaayat Farma.

31
Aur Jab Hamare Farishte Ibrahim A.S. Ke Paas Khusi Ki Khabar Le Kar Aaye Toh Kehne Lage Ke Ham Is Basti Ke Lougon Ko Halak Kar Dene Wale Hain Ke Yahan Ke Rehne Wale Nafarmaan Hain.

32
Ibrahim A.S. Ne Kaha Ke Is Main Toh Loot A.S. Bhi Hain. Wo Kehne Lage Ke Joh Loug Yahan Rehte Hain Hamain Sab Maaloom Hain. Ham Un Ko Aur Un Ke Ghar Walouon Ko Bacha Lain Ge,  Bajaz Un Ki Biwi Ko Wo Peeche Rehne Waloun Main Ho Gi.

33
Aur Jab Hamare Farishte Loot A.S. Ke Paas Aaye Toh Wo Un Ki Waja Se Na Khush Aur Tang Dil Hue. Faristoun Ne Kaha Kuch Khof Na Kijiye.Aur Na Ranj Kijiye, Ham Aap Ko Aur Aap Ke Ghar Waloun Ko Bacha Lainge, Magar Aap Ki Biwi, Ke Peeche Rehne Waloun Main Hogi.

34
Ham Is Basti Ke Rehne Waloun Par, Is Sabab Se, Ke Ye Badkirdaari Karte Rahe Hain Aasmaan Se Azaab Nazil Karne Wale Hain.

35
Aur Ham Ne Samajhne Wale Lougon Ke Liye Is Basti Se Aik Khuli Nishani Chor Di.

36
Aur Madan Ki Taraf Un Ke Bhai Shoaib A.S. Ko Bhaija, Toh Unhoun Ne Kaha Ae Qoum Khuda Ki Ibadat Karo Aur Pichle Din Ke Aane Ki Umeed Rakho Aur Mulk Main Fisaad Na Machaao.

37
Magar Unhoun Ne Unko Jhoota Samjha, So Un Ko Zalzale Ke Azaab Ne Aa Pakra Aur Wo Apne Gharoun Main Oundhe Pare Reh Gaye.

38
Aur Aad Aur Samood Ko Bhi Ham Ne Halak Kar Dia, Chunacha Un Ke Weeraan Ghar Tumhari Aankhoun Ke Saamne Hain Aur Shaitaan Ne Un Ke Aamal Un Ko Aaraasta Kar Dikhaye Aur Un Ko Seedhe Raaste Se Rouk Dia.Halaanke Wo Daikhne Wale Loug The.

39
Aur Qaaroon Aur Firown Aur Hamaan Ko Bhi Halaak Kar Dia Aur Un Ke Paas Mooosa A.S. Khuli Nishaniya Le Kar Aaye, Toh Wo Mulk Main Magroor Ho Gaye Aur Wo Hamare Qaaboo Se Nikal Jaane Wale Na The.

40
Toh Ham Ne Sab Ko Un Ke Gunahoun Ke Sabab Pakar Liya. So Un Main Kuch Toh Aise The Jin Par Ham Ne Patharoun Ka Meenh Barsaaya. Aur Kuch Aise The Jin Ko Chinghaar Ne Aa Pakra,  Aur Kuch Aise The Jin Ko Ham Ne Zameen Main Dhansa Dia. Aur Kuch Aise The Jin Ko Gharq Kar Dia Aur Khuda Aisa Na Tha Ke Un Par Zulm Karta Lekin Wohi Apne Aap Par Zulm Karte
The.


41
Jin Lougon Ne Khuda Ke Siwa Auroun Ko Kaar Saaz Bana Rakha Hai Un Ki Misaal  Makri(Spider) Ki Si Hai, Ke Wo Bhi Aik Tarha Ka Ghar Banati Hai. Aur Kuch Shak Nahi Ke Tamaam Gharoun Se Kamzor Makri Ka Ghar Hai Kaash Ye Is Baat Ko Jaante.

42
Ye Jis Cheez Ko Khuda Ke Siwa Pukaarte Hain, Khuah Wo Kuch Hi Ho Khuda Usse Jaanta Hai. Aur Wo Ghaalib Aur Hikmat Wala Hai.

43
Aur Ye Misaalain Ham Lougon Ke Samjhaane Ke Liye Bayan Karte Hain Aur Isse Toh Ehl-E-Daanish Hi Samajhte Hain.

44
Khuda Ne Aasmaanoun Aur Zameen Ko Hikmat Ke Sath Paida Kia Hai. Kuch Shak Nahi Ke Eemaan Waloun Ke Liye Is Main Nishaani Hai.

45
Ae Muhammad S.A.W. Ye Kitaab Joh Tumhari Taraf Wahi Ki Gai Hai, Is Ko Parha Karo Aur Namaaz Ke Paaband Raho. Kuch Shak Nahi Ke Namaaz Be Hayayee Aur Buri Baatoun Se Rokti Hai. Aur Khuda Ka Zikar Bara Acha Kaam Hai. Aur Joh Kuch Tum Karte Ho Khuda Usse Jaanta Hai.

46
Aur Ehl-E-Kitaab Se Jhagra Na Karo, Magar Aise Tareeq Se Ke Nihayat Acha Ho. Haan Joh Un Main Se Be Insaafi Karain Un  Ke Sath Issi Tarha Mujaadla Karo Aur Keh Do Ke Joh Kitaab Ham Par Uttri Aur Joh Kitaabain Tum Par Utreen Ham Sab Pe Eemaan  Rakhte Hain Aur Hamara Tumahra Maabood Aik Hi Hai Aur Ham Ussi Ke Farmabardaar Hain.

47
Aur Ussi Tarha Ham Ne Tumhari Taraf Kitaab Utaari Hai. Toh Jin Lougon Ko Ham Ne Kitaabaain Di Theen Wo Is Par Eemaan Le Aate Hain Aur Baaz In Mushrik Lougon Main Se Bhi Is Par Emaan Le Aate Hain.Aur Hamari Aayatoun Se Wo Hi Inkaar Karte Hain Joh Kaafir-e-Azzli Hain.

48
Aur Tum Is Se Pehle Koi Kitaab Nahi Parhte The Aur Na Isse Apne Hath Se Likh Hi Sakte The, Aisa Hota Toh Ehle-E-Baatil Zaroor Shak Karte.


49
Balke Ye Roshan Aayatain Hain. Jin Lougon Ko Ilm Dia Gaya Hai Un Ke Seenoun Main Mehfooz Aur Hamari Aayatoun Se Wo Hi Loug Inkar Karte Hain Joh Be Insaaf Hain.

50
Aur Kaafir Kehte Hain Ke  Is Par Is Ke Parwardigar Ki Taraf Se Nishaaniyan Kion Nazil Nahi Houyee, Keh Do Ke Nishaaniyan Toh Khuda Hi Ke Paas Hain.Aur Main Toh Khullam Khulla Hidayat Karne Wala Hoon.

51
Kia Un Lougon Ke Liye Ye Kaafi Nahi Ke Ham Ne Tum Par Kitaab Nazil Ki Joh Unko Parh Kar Sunaaye Jati Hai. Kuch Shak Nahi Ke Momin Lougon Ke Liye Is Main Rehmat Aur Naseehat Hai.

52
Keh Do Ke Mere Aur Tumahre Darmayan Khuda Hi Gawaah Kaafi Hai, Joh Cheez Aasmaanoun Main Aur Zameen Main Hai, Wo Sab Ko Jaanta Hai.Aur Jin Lougon Ne Baatil Ko Maana Aur Khuda Se Inkaar Kia, Wo Hi Nuqsaan Uthaane Wale Hain.

53
Aur Ye Loug Tum Se Azaab Ke Liye Jaldi Kar Rahe Hain. Agar Aik Waqt-E-Muqarrar Na Ho Chukka Hota Toh Un Par Azab Aa Bhi Gaya Hota. Aur Wo Kisi Waqt Main Un Par Zaoor  Nagahaan Aa Kar Rahe Ga Aur Un Ko Maaloom Bhi Na Hoga.

54
Ye Tum Se Azaab Ke Liye Jaldi Kar Rahe Hain.Aur Dozakh Toh Kaafiroun Ko Ghair Lene Wali Hai.

55
Jis Din Azaab Un Ko Un Ke Oopar Se Aur Neeche Se Dhaank Le Ga Aur Khuda Farmaaye Ga Ke Joh Kaam Tum Kia Karte The Ab Un Ka Mazaah Chakho.

56
Ae Mere Bando, Joh Eemaan Laye Ho,  Meri Zameen Faraakh Hai, Toh Meri Hi Ibadat Karo.

57
Har  Muttnaffis Mout Ka Mazah Chakhne Wala Hai. Phir Tum Hamari Hi Taraf Lout Kar Aao Ge.
58
Aur Joh Loug Eemaan Laye Aur Naik Amal Karte Rehe Un Ko Ham Behshat Ke Oonche Oonche Mehloun Main Jaga Dainge. Jin Ke Neeche Nehrain Beh Rahi Hain. Hamesha Un Main Rahain Ge. Naik Amal Karne Waloun Ka Ye Khoob Badla Hai.

59
Joh Sabar Karte Aur Apne Parwardigar Par Bharosa Rakhte Hain.

60
Aur Aur Bohot Se Jaanwar Hain Joh Apna Rizq Uthaaye Nahi Phirte, Khuda Hi Unko Rizqq Deta Hai Aur Tum Ko Bhi .Aur Wo Sunn-Ne Wala Aur Jaan-Ne Wala Hai.

61
Aur Agar Un Se Poocho Ke Aasmaanoun Aur Zameen Ko Kis Ne Paida Kia Aur Sooraj Aur Chaand Ko Kis Ne Tumhare Zer-E-Farmaan Kia, Toh Keh Dainge Khuda Ne Toh Phir Ye Kahn Ulte Jaa Rahe Hain?

62
Khuda Hi Apne Bandoun Main Se Jis Ke Liye Chahata Hai Rozi Faraakh Kar Deta Hai Aur Jis Ke Liye Chahta Hai Tang Kar Deta Hai Beshak Khuda Har Cheez Se Waaqif Hai.

63
Aur Agar Tum Un Se Poocho Ke Aasmaan Se Paani Kis Ne Barsaaya Phir us Se Zameen KouIs Ke Marne Ke Baad Kis Ne Zinda Kia Toh Keh Dainge Ke Khuda Ne. Keh Do Ke Khuda Ka Shukar Hai. Lekin Un Main Aksar Nahi Samajhte.

64
Aur Ye Dunia Ki Zindagi Toh Sirf Khail Aur Tamasha Hai Aur Hamesha Hi Zindagi Ka Maqaam Toh Aakhrat Ka Ghar Hai. Kaash Ye Loug Samaujhte.

65
Phir Jab Ye Kashti Main Sawaar Hote Hain Toh Khuda Ko Pukaarte Aur Khaalis Ussi Ki Ibadat Karte Hain,  Lekin. Jab  Wo Unko Nijaat De Kar Khushki Par Pohoncha Deta Hai Toh Jhat Shirk Karne Lag Jate Hian.

66
Taa-Ake Joh Ham Ne Un Ko Bakhsha Hai Us Ki Na Shukri Karain Aur Faaida Uthaaye. So Khair Anqareeb Unko Maaloom Ho Jaye Ga.

67
Kia Unhoun Ne Nahi Daikha Ke Ham Ne Haram Ko Maqaam-E-Aman Banaya Hai Aur Loug Un Ke Girdd-O-Nawah Se Uchak Liye Jate Hain. Kia Ye Loug Baatil Par Aitqaad Rakhte Hain Aur Khuda Ki Naimatoun Ki Na Shukri Karte Hain.

68
Aur Us Se Zaalim Koun Joh Khuda Par Johoot Bohtaan Baandhe Ya Jab Haq Baat Us Ke Paas Aaye Toh Us Ki Takzeeb Kare. Kia Kaafiroun Ka Thikana Jahannum Main Nahi Hai?

69
Aur Jin Lougon Ne Hamare Liye Koshsih Ki Ham Un Ko Zaroor Apne Raste Dikha Dainge. Aur Khuda Toh Naiko Kaaroun Ke Sath Hai.

^^^^^^^^^^^^^^^^^^^^^^^^^^^^^^^^^^^

Posted by at No comments:
Labels:
Subscribe to: Posts (Atom)